DILI, 01 juñu 2020 (TATOLI)-Komandante Ein-Xefe FALINTIL, Kay Rala Xanana Gusmão, apresia ho serbisu konjunta Komandu Unidade Patrullamentu Fronteira (UPF) ho FALINTIL-Forsa Defeza Timor-Leste (F-FDTL) hodi halo operasaun konjunta no hametin seguransa iha liña fronteira rai-maran (terrestre) durante ne’e.
Notísia Relevante : Tama Ilegál, Estudante Timoroan 16 Entrega-An ba UPF
Xanana hateten, ohin loron povu nasaun viziñu sira husi ASEAN liu-liu Indonézia moras COVID-19 ataka ho númeru boot tebes, tanba ne’e Timor-Leste tenke asegura mak seguransa iha fronteira atu la bele fó espasu ba kualkér sidadaun hakur liu fronteira ilegálmente hodi lori peste letál ne’e mai da’et ba komunidade Timor-Leste.
“Ita sorte. Fou-foun ita rejista ema moras barak, mais agora komesa di’ak hotu ona, maibé importante liu maka ita nia polísia no F-FDTL taka metin iha fronteira ne’ebá, selae moras ne’e mai hurulele ita mate hasan iha rai boot, rai riku sira iha Europa,” hateten Lider Karizmátiku ne’e ba populasaun sira bainhira hala’o asaun solidariedade iha Suku Kulu-hun-California, Dili, segunda (01/06/2020).
Xanana mós husu atu UPF no F-FDTL kontinua halo patrullamentu kontrola liña fronteira Motain ba too Covalima, no Oe-cusse ne’ebé potensiál hodi evita ema halo movimentu ilegál tama-sai.
Antes ne’e, Komandante UPF, Superintendente Xefe, João Belo dos Reis rasik deklara ona katak, UPF no F-FDTL halo patrullamentu konjunta inklui sosializa informasaun prevensaun COVID-19 ba abitante sira iha liña fronteira hodi ajuda forsa-rua bele kontrola ema halo movimentu ba mai fronteira.
UPF rasik mós durante ne’e kaer estudante Timoroan sira, inklui sidadaun estranjeiru balun ne’ebé halo movimentu ba mai ilegálmente no entrega ba ekipa saúde COVID-19 hodi submete kuarentena obrigatóriu.
Tuir dadus ne’ebé Ajénsia Tatoli ohin rekolla husi média Indonézia fó sai haktuir katak, iha Timor Osidentál, Provínsia Kupang- Indonézia, rejista pasiente COVID-19 hamutuk ema na’in-97 no na’in-14 rekupera ona saúde no na’in-ida (1) mak mate.
Jornalista : Eugénio Pereira
Editór : Francisco Simões
