Estudante Timoroan kontinua tama mai Timor-Leste liuhosi Postu Integradu Fronteira Batugade, Bobonaro, sabádu (04/04/2020). Imajen/Eugénio Pereira

BATUGADE, 04 abríl 2020 (TATOLI)- Estudante Timoroan na’in 16, ohin, tuku 04:00 dadeer, entrega-an voluntáriamente ba Polísia Unidade Patrullamentu Fronteira (UPF) iha postu integradu fronteira Batugade, Bobonaro, tanba hakur tama mai Timor-Leste ho ilegálmente.

Notísia Relevante : Estudante Timoroan 52 Tama-Tan Hosi Fronteira Batugade

Ekipa COVID-19 rega hela líkidu disinfection ba estudante sira ne’ebé ohin tama hosi liña fronteira Indonézia mai Timor-Leste. Imajen/Eugénio Pereira

Estudante hirak-ne’e liuhosi Tali-laran, liña fronteira Batugade, maibé ho voluntáriamente entre-an ba UPF hodi aprezenta kedas sira ba ekipa médiku COVID-19 ne’ebé destaka iha Postu Integradu Batugade.

Estudante-sira ne’e kompostu hosi ema na’in lima (5) mai hosi Surabaya, na’in hitu (7) hosi Jogjakarta no na’in haat (4) hosi Kupang. Sira  deside fila mai Timor-Leste tanba ta’uk ho propagasaun pandemia Coronavirus ka COVID-19.

Tuir observasaun Ajénsia Tatoli nian nota katak, ekipa COVID-19 kompostu hosi doutór ida ho médiku jerál na’in neen (6) maka hala’o serbisu oras 24 nia-laran no uza Infrared Thermometer hodi teste estudante sira-nia kondisaun saúde no la deteta sintoma moras ruma.

Submete tiha ba teste saúde, estudante sira-ne’e  aprezenta-an ba ekipa Servisu Migrasaun hodi haree sira-nia pasaporte no identifika katak estudante balu nia pasaporte no KITAS mate, nune’e obriga estudante-sira tama TL liu dalan ilegál.

Ekipa COVID-19 halo teste ba estudante Timoroan ne’ebé tama mai Timor-Leste, sabábu (04/04/2020). Imajen/Eugénio Pereira

Hermelo José Pereira, estudante  hosi Jogjakarta, hateten, sira tama ilegál, tanba dokumentu balun mate no balun osan la iha atu selu visa.

“Ami na’in 16 maka deside tama ilegál mai, tanba ami nia dokumentu mate no osan la iha atu selu visa, nune’e ami tama mai entrega-an kedas UPF ne’ebé halo seguransa hodi haruka ami mai koopera ho médiku para fó teste ba  ami hotu-hotu,” Hermelo José Pereira hateten.

Nia dehan, sira deside fila, tanba ta’uk ho propagasaun s COVID-19 no família iha Dili ezije sira tenke fila mai Timor-Leste.

Ohin dadeer, estudante na’in haat (4) kompostu hosi  feto na’in rua no mane na’in rua mós Tentara Nasionál Indonézia (TNI) prende hela iha fronteira Montain hodi submete lai ba teste médiku molok  autoriza sira tama mai fronteira Batugade.

Informasaun ne’ebé Tatoli hetán hosi autoridade fronteira katak, Liña fronteira Batugade, Mota Masi no Oe-Cussse, ohin, Governu Timor-Leste deside taka provizóriu ona, no hosi ohin dadeer too lokraik,  estudante Timoroan ne’ebé fila hosi Indonézia tama mai Timor-Leste hamutuk ema na’in 55, kompostu hosi feto  na’in 19 no  mane na’in 36.

Daudaun ne’e, ekipa Konsuladu Timor-Leste Kupang no Atambua inklui ekipa protokolu Ministériu Negósiu Estranjeiru no Kooperasaun (MNEK) hetan apoiu hosi UPF kontinua akompaña nafatin estudante sira ne’e nia  viajen kontinua mai Dili.

Jornalista : Eugénio Pereira 

Editór       : Francisco Simões

HAKEREK NO HATÁN

Please enter your comment!
Please enter your name here