Lider Karizmátiku, Kay Rala Xanana Gusmão, koordena ho sarani sira hodi apoia reabilita Kapela Santo António, Aldeia Bedois, Suku Camea, Postu Administrativu Kristu Rei, Munisípiu Dili. Imajen/Eugénio Pereira

DILI, 01 juñu 2020 (TATOLI) – Lider Karizmátiku, Kay Rala Xanana Gusmão, segunda (01/06/2020), hamutuk ho sarani estasaun Santo António Bedois, Dili,  tun direita ba loja hodi kompras simente saka 50 no sosa rai-henek karada-lima (5) hodi ajuda reabilita Kapela Santo António, Aldeia Bedois, Suku Camea, Postu Administrativu Kristu Rei, Munisípiu Dili.

Notísia Relevante : Xanana Promete Fasilita Jeremias Halo Tratamentu iha Singapura

Apoiu ne’e oferese, hafoin Komunidade Aldeia Bedois ne’ebé pertense ba Parókia Santa Teresinha do Menino Jesus liuhusi Komisaun Organizadora hato’o proposta hodi harii gruta Santo António nu’udar mahein ba sarani-sira.

Antes ne’e, sarani Bedois ho uma-kain-156 fó ona kontribuisaun osan kada família $15.00 no serbisu ho voluntáriu konstrui gruta ne’e dezde iha 21 Fevereiru 2020, no tuir kalendáriu tenke finaliza ona obra ne’e iha loron 01 juñu 2020, maibé ezekusaun serbisu la’o neineik tanba susar tebes iha kbiit finanseira atu bele sosa material sira.

Reprezentante Komunidade Bedois, Antónia da Costa Freitas hato’o agradese ho apoiu ne’ebé oferese husi Xanana bele ajuda ona sira halo konstrusaun ba gruta ne’e.

“Ami agradese ba maun Xanana hodi ajuda simente saka 50 ho rai henek, inklui sei fó tan fiu no lampu bainhira konstrusaun remata,” dehan Antonio, bainhira akompaña Xanana halo vizita haree direta konstrusaun gruta ne’e.

Xanana mós apresia tebes ho vontade sarani sira harii gruta nu’udar fatin adorasaun hodi sai mahein ba sarani Katólika sira.

“Ha’u fó de’it maka simente ho rai-henek, depois imi halo hotu ona, foin haruka lampu mai no fiu hodi monta,” dehan Xanana.

Gruta ne’e rasik harii hetan apoiu mós husi Padre Parókia Igreja Bedois, Alberty Franco Morrato ho nia objetivu prinsipál nu’udar identidade fiar Sarani Bairru Bedois bele uza hasa’e orasaun no hametin vida espirituál no sai mós nu’udar símbolu fiar, hadomi, unidade no pás ba sarani sira.

Iha tempu hanesan, Xanana orienta mós ekipa téknika ohin arranka ba Suku Liurai, Postu Administrativu Remaxio, Munisípiu Aileu hodi haree prosesu atu halo reabilitasaun kapela Suku Liurai nian ne’ebé sarani sira harii ona.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here