Diretór Ezekutivu Servico Autonomo Medicamentos Equipamentos Saúde (SAMES), Santana Martins. Imajen/Egas Cristovão

DILI, 01 juñu 2020 (TATOLI)-Servisu Autónomu Medikamentu no Ekipamentu Saúde (SAMES) daudaun ne’e rai ona ai-moruk prevensaun ba sintoma COVID-19 ne’ebé maka sosa husi Programa Dezenvolvimentu Nasaun Unida (UNDP-sigla inglés) ho orsamentu estadu millaun $ 14.

Iha faze dahuluk nian, PNUD entrega ona tablet hamutuk 50.000 ho ninia todan besik tonelada ida ba Governu liuhosi Ministériu Negósiu Estranjeiru no Kooperasaun iha sesta (29/05/2020) liuba.

Maski simu ona medikamentu ne’e husi Organizasaun ne’e maibé, Santana Martins, la esplika ho detaillamente ba públiku.

Notísia Relevante :PNUD Hatama Ona Ekipamentu Prevensaun COVID-19 Mai TL

Diretór Ezekutivu SAMES, Santana Martins, informa ai-moruk ne’ebé maka Governu hameno ba PNUD hodi sosa ne’e la refere liu ba halo tratamentu ba pasiente COVID-19 maibé sei uza hodi kura moras komplikasaun no pasiente ne’ebé iha sintoma coronavirus.

”Ai-moruk sira ne’ebé mak ita-nia Governu sosa ne’e la refere liu ba COVID-19, maibé ita uza ba tratamntu sintoma sira ne’e no ita uza ba moras komplikasaun nian, la’ós trata de’it moras COVID-19,” esklarese Diretór Santana Martins, ba Jornalista sira iha Palasiu Sinzas, Caicoli, segunda (01/06/2020).

Nia adianta tuir planu SAMES sei simu tan ekipamentu prevensaun COVID-19 faze daruak nian husi PNUD iha tempu badak tanba material hirak ne’e dadaun ne’e iha ona dalan.

“Oras ne’e daudaun ekipa resepsaun no inspensaun halo hela inspesaun ba nia kualidade no kuantidade no depois ofisialmente ami sei relata tanba relatóriu ba ai-moruk nian ita seidauk simu husi UNDP nian,”Dehan Dirijente SAMES.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here