Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 29 maiu 2020 (TATOLI)-Programa Nasaun Unida ba Dezenvolvimentu (UNDP-sigla inglés), iha sesta (29/05/2020) hatama ona ekipamentu ba prevensaun surtu COVID-19 ba faze dahuluk mai Timor-Leste.

UNDP sosa fasilidade hirak ne’e bazea ba pedidu hosi Governu liuhusi Ministériu Saúde (MS) ho orsamentu ne’ebé prevee hamutuk millaun $ 14.

Ministru Negósiu Estranjeiru no Kooperasaun (MNEK), Dionísio da Costa Babo Soares, sesta ohin simu ona material prevensaun COVID-19 no ai-moruk esensiál seluk tan, diretamente husi reprezentante UNDP iha Timor-Leste, Munkhtuya Altangerel, iha Aeroportu Internasionál Nicolau Lobato, Comoro, Dili.

“Ekipamentu sira-nia aprovizionamentu halo iha Europeia hanesan Alemanã, Franca, Itália, Bélgica no seluk tan), hosi Índia ho Xina ne’ebé iha ona rekoiñesementu internasionál, hodi garante kualidade tuir padraun Organizasaun Mundiál Saúde (OMS),”dehan, Dionísio Babo Soares, ba TATOLI, via mídia sosiál facebook.

Governante ne’e rekoiñese prosesu hatama ekipamentu ba prevensaun coronavirus hirak ne’e mai rai-laran la’o neneik tanba Governu tenki akompaña prosesu aprovizionamentu ida ho rigor hodi evita ai-moruk falsu.

“Durante ne’e MNEC ho Ministériu Saúde akompaña prosesu aprovizionamentu kada faze ho kontrolu kualidade ho rigorozu hodi evita labele iha falsifikasaun maibé tenki tuir padraun WHO,”tenik tan.

Alende ne’e,aviaun ne’ebé maka tula ai-moruk ne’e tenki liuhosi nasaun barak tanba ne’e maka mosu atraza oituan.

“Ekipamentu sira ne’e Tama liuhosi nasaun lubuk ida, nasaun sira ne’e mós halo inspesaun portuária hodi garante katak laiha buat ida maka falsu,” Babo Subliña.

Iha faze dahuluk, iha sesta ne’e PNUD entrega tablet hamutuk 50.000 ho ninia todan besik tonelada ida.

No tuir planu iha sábadu (30/05/2020) aban, Organizasaun Internasionál sei entrega tan ekipamentu inklui ai-moruk balun tan tanba daudaun ne’e iha ona Aeroportu Brisbane, Austrália.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here