Ekipa Gabinete PA RAEOA-SEESM hamutuk ho Xefe Aldeia no Xefe Suku, kontinua distribui apoiu umanitaria ba kbi’it laek sira iha Aldeia Bonemese, Suku Naimeko, Pante Makassar, sesta (15/05/2020). Imajen Gabinete PA RAEOA-ZEESM.

DILI, 17 maiu 2020 (TATOLI)–Xefe Gabinete Interinu Prezidente Autoridade Rejiaun Administrativa Espesiál Oecusse Ambenu (RAEOA), Agustinho Caet hateten, durante ne’e Prezidente Autoridade José Luis Guterres “Lugu” la abandona no la hela metin iha Oe-Cusse tanba de’it kestaun Politika rai laran.

Situasaun ida ne’e, nia hatutan, tenke obriga no ezije Prezidente Autoridade Rejiaun Administrativa Espesiál Oecusse Ambenu (RAEOA) hakbesik-aan ba Governu nasionál hodi halo negosiasaun atu hetan apoiu hodi bele fó apoiu ba povu Atoni Oe-Cusse ne’ebé daudaun ne’e enfrenta hela problema.

“Ita haree situasaun polítika rai laran, Orsamentu Jerál Estadu (OJE) 2020 laiha no mós situasaun surtu Coronavirus (COVID-19), obriga Prezidente Autoridade tenke ba-mai Dili-Oe-Cusse hodi buka apoiu umanitáriu tanba povu Atoni izola-aan no presiza tebes apoiu. Realidade hatudu katak  Lugu la abandona no ba-mai Dili-Oe-Cusse mak Povu Atoni ohin loron hetan ona apoiu umanitáriu,” dehan Agustinho Caet hodi hatan ba Sosiedade Sivil RAEOA nia preokupasaun kona-ba Prezidende Autoridade RAEOA abandona Oe-Cusse, ba jornalista sira iha Hotel Timor, foin lalais ne’e.

Nia dehan, iha períodu Estadu Emerjénsia dahuluk, povu Atoni susar atu hetan konvustivel durante fulan ida no ho esforsu Prezidente Autoridade ho ekipa mai koordena ho Governu sentrál ikus mai konsege transporta konvustivel ba Oe-Cusse, maski iha altura ne’ebá bandu totál movimentu transporte públiku inklui transporte marítima atu la’o ba-mai.

“Laiha Lei ruma ne’ebé  hatete katak Prezidente Autoridade tenke hela metin de’it iha Oe-Cusse. Tanba Movimentu ba-mai Dili Oe-Cusse ba asuntu servisu nian,” Caet subliña.

Nia mós fó hanoin, iha fulan ida ne’e, hafoin xefe estadu prolonga Estadu Emerjénsia ba daruak, Prezidente Autoridade tenke movimentu ba-mai atu bele buka apoiu nesesidade báziku, koordena ho Governu sentrál nia rezultadu hatudu katak Governu sentrál deside ona hodi fó apoiu fós ba povu Atoni hamutuk saka 6.000.

Xefe Gabinete Interinu Prezidente Autoridade Rejiaun Administrativa Espesiál Oecusse Ambenu (RAEOA), Agustinho Caet. Imajen Tatoli/Cipriano Colo.

“Hosi fós saka 6.000 ne’e, Governu sentrál entrega ona saka 1.000 ba Autoridade no Autoridade distribui ona saka 750 ba Populasaun iha Ambenu, saka 250 distribui ona ba estudante Ambenu-oan sira ne’ebé hela iha Dili. Kona-ba fós saka 5.000, parte autoridade seidauk bele foti hosi Governu sentrál tanba fós rezerva iha Dili sei menus,” nia esplika.

Nia informa, molok hetan apoiu fós hosi Governu sentrál, Autoridade mós servisu hamutuk ona ho emprezáriu lokál hosi Oe-Cusse, liuliu Fernando Manat no sira seluk tan, hodi oferese fós saka 1.000 ne’ebé distribui iha Oe-Cusse no estudante Oe-Cusse-oan iha Dili 300 resin.

Kona-ba distribuisaun fós iha Oe-Cusse, Caet esplika,  oras ne’e Autoridade fahe ona ba populasaun sira iha suku 14, hela suku haat (4) mak seidauk hetan. Hirak ne’ebé seidauk hetan, autoridade sei esforsu hela atu iha loron rua nia laran tenke distribui hotu tanba povu presiza tebes apoiu.

“Autoridade tun direta hodi haree situasaun to’o iha suku sira ne’ebé izoladu liu. Realidade hatudu katak povu hamlaha, la’ós de’it iha situasaun surtu Coronavirus (COVID-19)  maibé impaktu hosi mudansa klimátika mós fó impaktu povu hamlaha maioria, liuliu sira ne’ebé  pertense ba tasi ibun kuaze tinan rua ka tolu ona, la konsege kolleta tanba udan-been menus,” nia rekoñese.

Foos ne’ebé iha, Caet dehan, Autoridade fahe mós ba orfonatu sira hanesan Topu Honis Kutetete, Mahata, Madre sira iha Padiae, Madre sira hosi Dominicana no mós labarik sira ne’ebé hela iha dormitóriu Parókia Baoknana.

“Oras ne’e falta de’it mak suku Lela-Ufe, Banafi, Nipani no Taiboko mak autoridade seidauk tama tanba horisehik foin mak fahe hotu iha suku ida izoladu liu mak naran Malelat. Maibé, aban sei esforsu hodi fahe hotu,” nia promote.

Entretantu, RAEOA iha Suku 18 mak hanesan, Suku Costa, Cunha, Lalisuk, Nipane, Naimeko, Lifau, Taiboko, Bobokase, Lela-Ufe, Suni-Ufe, Ban-Afi, Usi-taku, Bene-Ufe, Malelat, Abani,  Usitasae, Usitaqueno no Bobometo.

Dadus husi Administrasaun Estatál RAEOA tianan 2020, hatudu katak, Oe-Cusse iha totál uma-kain hamutuk 19.839 iha sub-rejiaun haat (4) no aldeia 63.

Antes ne’e, Sosiedade Sivíl RAEOA liuhusi konferénsia Imprensa espressa sira-nia deskontentamentu tanba tuir sira-nia observasaun katak, desde simu pose iha novembru 2019, Prezidente Autoridade José Luis Guterres la hela iha Oe-Cusse no vizita liu de’it iha Fim de semana, depois fila-fali ba Dili.

Notísia Relevante: Sosiedade Sivíl RAEOA Deskontente Prezidente Autoridade “Abandona” Oe-Cusse

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here