Labarik sira. Imajen/António Gonçalves

DILI, 01 juñu 2020 (TATOLI)–Responsável ba Manajementu Kazu iha Uma Mahon Fundasaun Forum Comunição Juventude (F-FCJ) Oratório Dom Bosco, Domingas Perreira, konsidera  juís sira iha Tribunál viola labarik sira-nia direitu tanba adia hela de’it julgamentu ba labarik sira-nia kazu. 

Notísia Relevante: Janeiru-Maiu 2020, F-FCJ Tau Matan ba Kazu Violasaun Labarik 23

“Dala-barak ita nia Juís sira ne’e mak viola labarik sira-nia direitu, liuliu iha tribunál tanba adia hela de’it julgamentu ba kazu labarik sira-nian, nune’e impede labarik ninia future,” dehan Domingas Perreira ba Ajénsia TATOLI iha Uma Mahon F-FCJ Oratóriu Dom Bosco, Balide, Dili, segunda ne’e.

Konsiderasaun ne’e, tuir nia haree, durante Janeiru to’o Maiu tinan 2020, Uma Mahon ne’e tau matan ba kazu Violasaun labarik hamutuk 23 mak pendente iha tribunál to’o ohin loron no hosi númeru ne’e kazu prosesu pendente 12 desde inísiu tinan 2019.

Nia esplika tan, hosi númeru ne’e iha feto na’in-19 no mane na’in-haat (4) ho idade menór hotu ne’ebé iha kazu dominante maka violénsia doméstika, violénsia seksuál no abuzu seksuál.

Nia haktuir, hosi kazu pendente hirak ne’e, juis sira iha tribunál  mak sempre adia loron julgamentu tanba desde tinan kotuk bainhira iha ona data fixu, Uma Mahon akompaña vitima ba tribunál maibé to’o iha Tribunál husu fila fali atu fulan oin mak mai fali.

“Ita ba tiha iha Tribunál, juis dehan fulan oin mak mai fali. Fulan oin ba fali, juis dehan tan fulan oin mak mai fali. Nune’e hela deit to’o fali enfrenta situasaun COVID-19. Tanba ne’e mak kazu sira ne’e husik hela de’it to’o fali agora halo labarik sira labele livre, tanba suspeitu mós abandona hela,” nia haktuir.

Ezemplu, nia hateten, kazu insestu ida to’o oras ne’e vitima mak sai fali vitima ba ninia kazu rasik, tanba suspeitu  livre tiha ona.

“Ita haree tanba kazu ne’e ho ninia aman rasik, nune’e ita haree katak justisa ne’e liuliu juis sira halo fali vítima sai-fali vitima ba ninia kazu rasik,” nia dehan.

Tanba ne’e, nia husu ba Tribunál atu hadia sistema prosesu julgamentu no di’ak liután bainhira aselera prosesu julgamentu ba kazu sira henesan ne’e,  tanba bele afeta ba labarik sira lakon futuru, enkuantu labarik hanesan vitima nia tenke kontinua sulan iha uma mahon.

Antes ne’e, Timor Letse adota konvensaun Direitu Labarik desde tinan 2013 ne’ebé Nasaun Unida adota iha tinan 1989, hodi fó protesaun ba labarik sira.

Notísia Relevante: Governu Sei Submete Fali Proposta Lei Protesaun Labarik Ba MAPK

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here