Vise-Ministra Solidariedade Sosiál, Signi Chandrawati Verdial. Imajen Egas Cristovão

DILI, 01 juñu 2020 (TATOLI)–Vise-Ministra Soldaridade Sosiál no Inkluzaun (MSSI), Signi Chandrawati Verdial, informa Governu liuhosi MSSI sei submete hikas Proposta Lei Protesaun Labarik ba Ministériu ba Asuntu Parlamentár no Komunikasaun (MAPK) hodi halo fali diskusaun no ba oin bele prosesa.

“Agora ita-nia Lei Protesaun ba Labarik nian, ita diskute hela no hatama fali iha Ministériu ba Asuntu Parlamentár no Komunikasaun (MAPK) atu loke fali diskusaun kona ba lei refere. Ami ho Parlamentu Nasionál mós ko’alia ona. Espera katak iha tempu badak ita sei bele dudu prosesu ne’e ba oin,” dehan Vise Ministra Solidaridade Sosiál no Inkluzaun, Signi Chandrawati Verdial, hafoin hala’o vizita ba labarik sira ne’ebé moras no baixa iha HNGV, Dili, segunda ne’e.

Nia hatutan, esbosu Lei Protesaun Labarik kaduka tiha no uluk halo tiha ona konsultasaun maibé lei ne’e kaduka iha Parlamentu Nasionál entaun sei halo fila-fali prosesu foun. Maibé, nia dehan, parte tékniku sira halo hela diskusaun.

“Espera katak halo fali diskusaun foun atu oinsá halo konsultasaun ba iha ita-nia sosiedade sivíl no komunidade sira atu tenke hahú prosesu foun fila fali. Ne’ebé, sei iha faze diskusaun hela. Maibé ita mós hatene katak ita la’o hela ho osan duodésimu, ita labele hala’o atvidade oin-oin. Haree took tinan oin mak Orsamentu Jerál Estadu (OJE) aprova foun, ita sei hala’o atividade sira,” nia esplika.

Nia dehan, agora sei iha situasaun Estadu emerjénsia ba moras COVID-19, tanba ne’e atividade hotu-hotu labele la’o maibé hein katak iha tempu badak sei normaliza no bele hala’o atividade hanesan baibain.

Iha komemorasaun loron Mundiál Labarik (01 juñu) tinan ne’e, Vise Ministra Soldaridade Sosiál no Inkluzaun (MSSI), Signi Chandrawati Verdial, hamutuk ho Komisária Nasionál Direitu Labaraik (KNDL), Dinora Granadeiro, hala’o vizita ba labarik moras sira iha Ospitál Nasionál Guido Valadares (HNGV-sigla Porugés) hodi fó apoiu moral ba sira-nia inan-aman sira.

“Ohin ita selebra loron mundál Labarik hotu-hotu iha mundu. Kuaze tinan-tinan ita halo atividade kona-ba loron mundiál labarik. Maibé tinan ne’e ita labele selebra no halo atividade tanba moras propagasaun COVID-19. Nune’e, ohin, ita mai halo atividade vizita labarik sira iha Hospitál Nasionál Guido Valadares (HNGV-sigla Porugés) ne’ebé moras hela hodi fó apoiu morál ba moras sira-nia inan-aman iha loron mundál ida-ne’e,” nia hateten.

Ativiade ida-ne’e, nia hatutan, parte MSSI bele halo tanba Timor Leste iha hela kondisaun Estadu Emerjénsia nia laran, nune’e labele hala’o atividade kona-ba loron mundiál ba labarik sira.

“Ita iha kondisaun Estadu Emerjénsia ba moras COVID-19 entaun ita labele halo atividade relasiona ho loron mudiál ba labarik sira,” nia dehan.

Notísia Relevante: Presiza Baze Legál Proteje no Regulariza Labarik Sira iha Timor-Leste

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here