Administradór Postu Adfministrativu Ataúro, Mateus Beli, iha serimónia simu ekpia Gabinete Apoiu Atividade Konjuje-Prezidente Repúblika (GAAC-PR) ne’ebé oferese nesesidade bázika ba família kbiit laek 500 hosi Suku Lima, iha Postu Administrativu Ataúro iha uma Merkadu Beloi. Imajen Tatoli/Cipriano Colo.

DILI, 30 maiu 2020 (TATOLI)–Administradór Postu Administrativu Ataúro, Mateus Belo, agradese ba Estadu Timor-Leste ne’ebé deside hodi aplika Liberdade ba movimentasaun iha rai laran iha estensaun Estadu Emrejénsia (EE) ba datoluk.

Mateus Belo agradese tanba bainhira estadu reativa hikas movimentasaun iha rai laran, sei tulun di’ak liután povu Ataúro atu bele la’o ba-mai hodi kontinua buka moris inklui ró bele ba-mai lori vizitante hodi bele hola komunidade ninia produtu.

“Ami kontente no agradese tanba iha estensaun Estadu Emerjénsia ne’e iha prolongasaun ba atividade sira atu povu bele movimentu hodi halo netik buat ruma, liuliu fó prolongasaun ba movimentu ró ba-mai Dili-Ataúro. Ne’e bele ajuda tebes komunidade Ataúro atu faan sira-nia produtu lokál,” Mateus Belo espresa sentimentu ne’e, durante serimónia  entrega apoiu umanitária hosi espoza Prezeidente Repúblika, Cidália Nobre Lopes Mouzinho Guterres, ba komunidade Ataúro iha uma merkadu Beloi, sábadu ne’e.

Mateus haktuir, durante estadu emerjénsia períodu rua tutuir malu, atividade ekonómika iha Ataúro mós para totál tanba komunidade maioria hetan rendimentu balu hosi ró ne’ebé tama-sai mak sira bele eproveita faan produtu lokál ne’ebé sira prodús inklui ikan.

“Ohin loron mós grasa boot ida ba komunidade Ataúro tanba marka prezensa hosi delegasaun boot ida hosi Gabinete Apoiu Atividade Conjuje  Prezidente Repúblika ne’ebé bele hola sira-nia produtu,” nia dehan.

Entretantu, Xefe Suku Vila-Maumeta, Filipe Ximenes, hateten Estadu prolonga Estadu Emerjénsia fó Liberdade ba movimentu rai laran, sei tulun mós povu Ataúro ne’ebé lubuk ida moris nu’udár peskadór atu bele faan ikan ne’ebé sira hetan.

Tanba, tuir nia, durante fulan rua laiha movimentu transporte marítima, povu labele ba-mai Dili liuliu laiha vizitante ba Ataúro atu hola ikan ne’ebé iha.

Entretantu, Dekretu Prezidensiál ne’ebé publika ona iha jornál repúblika ho númeru 35/2020 hateten katak Estadu Emerjénsia ba períodu datoluk, hahú funsiona iha oras 00:00 loron 28 fulan maiu to’o oras 23:59 loron 26 fulan juñu 2020.

Estadu Emerejénsia ba datoluk, ne’ebé Prezidente Repúblika renova, suspende direitu tolu mak hanesan Sirkulasaun internasionál, Liberdade sirkulasaun no hili hela-fatin iha territóriu nasionál, inklui direitu ba rezisténsia.

Notísia Relevante: GAAC-PR Fó Apoiu Nesesidade Bázika ba Família Uma-Kain 500 iha Ataúro

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here