Espoza Prezidente Repúblika, Cidália Nobre Lopes Mouzinho Guterres, simbolikamente oferese nesesidade bázika ba família uma-kain 500 hosi suku lima iha Postu Administrativu Ataúro, iha uma Merkadu Beloi. Imajen Tatoli/Cipriano Colo.

DILI, 30 maiu 2020 (TATOLI)–Espoza Prezidente Repúblika, Cidália Nobre Lopes Mouzinho Guterres, liuhosi Gabinete Apoiu Atividade Kónjuje Prezidénsia Repúblika (GAAC-PR sígla Portugés) oferese nesesidade bázika ba família kbiit laek sira hamutuk uma- kain 500 (atus lima) husi suku lima (5) iha postu Administrativu Ataúro, Munisípiu Dili.

Cidália hateten, apoiu ne’e atu tulun família sira ne’ebé presiza duni la’ós de’it iha situasaun surtu Coronavirus (COVID-19) maibé responde mós situasaun atuál, liuliu hakmaan komunidade Ataúro nia terus iha tinan rua ikus ne’ebé kauza hosi mudansa klimátika.

“Apoiu ne’ebé ami oferese, ne’e inisiativa hosi ha’u rasik. Antes ne’e ha’u husu direta ba administradór ho autoridade lokál sira, atu identifika família kbiit laek sira. Atu dehan katak, tuir loloos hotu-hotu tenke hetan tanba hotu-hotu afetadu ba surtu COVID-19, nune’e mós mudansa klimátika iha tinan rua ikus ne’e. Maibé tanba ami-nia kbiit la to’o, nune’e ami bele responde de’it sira ne’ebé presiza liu,” dehan Cidália Nobre Lopes Mouzinho Guterres iha serimónia entrega simbólikamente apoiu ba reprezentante família kbiit laek sira hosi suku lima iha uma Merkadu Beloi Ataúro, sábadu ne’e.

Cidália rekuñese limitasaun no husu deskulpa tanba GAAC-PR bele responde de’it ho saida mak iha no ho hanoin ida katak servisu hamutuk entre autoridade lokál sira, liuliu xefe suku no xefe aldeia sira ne’ebé hatene di’ak ida-idak ninia komunidade atu identifika sira ne’ebé merese duni atu hetan uluk apoiu umanitária iha tempu ida-ne’e, ikus mai dadus iha duni.

Tanba ne’e, espoza Xefe Estadu hein katak autoridade lokál sira sei fornese duni apoiu uitoan ne’ebé GAAC-PR oferse ba to’o duni komunidade nia liman, nune’e bele sustenta no tahan moris iha situasaun ida-ne’e.

“Hanesan Ataúro oan, ha’u lakohi atu ha’u-nia inan-aman sira mate tanba hamlaha. Se mate tanba moras, ne’e buat seluk. Tanba ne’e, ha’u hein katak familia sira ne’ebé presiza liu, bele tahan netik ho apoiu uitoan ne’ebé oferse ona, hodi hein subsidiu $100 ba kada uma-kain hosi Governu,” nia fó hanoin.

Inan nasaun ne’e informa ba komunidade Ataúro katak GAAC-PR oferese apoiu hirak ne’e tanba servisu hamutuk ho fundasaun SADIA ne’ebé simu apoiu hirak ne’e hosi Governu Xina.

“Fundasaun SADIA nu’udár parseriru ida-ne’ebé mak sira sempre apoia GAAC-PR. Tanba sira iha hanoin di’ak ba povu Timor-Leste, liuliu ba komunidade Ataúro. Tinan-tinan sira sempre oferese apoiu uitoan tuir programa ne’ebé GAAC-PR trasa ona,” inan nasaun ne’e informa.

Iha fatin hanesan, Administradór Postu Administrativu Ataúro, Mateus Belo, lori komunidade nia naran agradese ba Espoza Prezidente Repúblika ne’ebé liuhosi GAAC-PR oferese ona apoiu umanitária ba komunidade Ataúro, nu’udár resposta direta ida ba sira-nia halerik, la’ós de’it iha situasaun COVID-19 maibé situasaun mudansa klimátika iha tinan rua ikus ne’e ne’ebé povu enfrenta hamlaha.

“Povu Ataúro enfrenta duni situasuan menus ai-han, la’ós tanba Coronavirus (COVID-19), hanesan maluk sira iha Dili no fatin seluk enfrenta. Maibé, ami iha Ataúro falta udan been. Desde tinan rua ba kotuk kauza hosi mudansa klimátika, ami la konsege kuda buat ruma atu bele kolleta hodi sustenta nesesidade sira, halo povu ida-ne’e enfrenta hamlaha. Tanba ne’e, agradese ba tulun hosi Espoza Prezidente Repúblika liuhsi GAAC-PR,” nia hateten.

Entretantu, sasán nesesidade báziku sira ne’ebé mak GAAC-PR oferese ba komunidade Ataúro mak hanesan Fós hamutuk saka 500, supermie kaisa 500, mina tein nian ho marka Sania kaixa 126.

Nesesidade báziku hirak ne’e sei oferese ba família uma-kain 500 tuir dadus ne’ebé autoridade lokál identifika ona mak kada suku uma-kain 100 mak hetan apoiu refere.

Tuir sensus uma-kain, tinan 2015, Postu Administrativu Ataúro
ne’ebé kompostu hosi suku lima (5) hanesan Suku Vila Mau-Meta, Beloi, Makadade, Makili, no Suku Bikeli ne’e, iha populasaun hamutuk 9.274.

Antes ne’e GAAC-PR oferese ona apoiu umanitaria ba komunidade sira iha Dili ne’ebé enfrenta hela inundasaun inklui komunidade kbiit laek sira ne’ebé afetadu hosi COVID-19.

Jornalista : Cipriano Colo

Editór         : Cancio Ximenes

HAKEREK NO HATÁN

Please enter your comment!
Please enter your name here