Prezidente Repúblika, Francisco Guterres Lú Olo, bainhira halo diskursu iha toma pose membru foun VIII Governu Konstitusionál. Sesta, 29-5-2020. Imajen António Gonçalves

DILI, 29 maiu 2020 (TATOLI)–Prezidente Repúblika (PR), Francisco Guterres “Lú Olo” deklara VIII Governu Konstitusionál
ne’ebé oras ne’e lidera hosi Primeiru-Ministru (PM) Taur Matan Ruak iha lejitimidade konstitusionál no kbiit mai-hosi Parlamentu Nasionál (PN).

Xefe EStadu hato’o Deklarasaun ne’e, liuhosi ninia deskursu iha  serimónia tomada de pose ba membru Governu na’in-ualu (8) iha Palásiu Prezidensiál Nicolau Lobato, Bairru Pité, Dili.

“Governu ida-ne’e iha lejitimidade konstitusionál no kbiit ida-ne’e mai-hosi Parlamentu Nasionál. Maioria foun ida mosu no  fó  dadaun ona apoiu ba Governu ida-ne’e. VIII  Governu hetan ona tane hosi maioria parlamentár ida no bele ukun to’o mandatu ramata,” PR Lú Olo hateten.

Xefe estadu ne’e hatutan, antes ne’e Primeiru-Ministru propoin ba Prezidente Repúblika atu nomeia membru balun ba  Governu no Konsellu Ministru aprova alterasaun dahuluk ba orgánika VIII Governu atu  Governu sai forte liután no ukun di’ak liután.

Ida ne’e, nia dehan, tanba hakarak kontribui ba hametin unidade nasionál no promove polítika grande inkluzaun iha governasaun mak Prezidente Repúblika promove diálogu ho partidu polítiku hotu-hotu ho asentu iha Parlamentu Nasionál no mós ho forsa polítika sira, konfisaun relijioza sira no organizasaun sosiedade sivíl hotu.

Ho espíritu ida ne’ e, nia hateten, mak maioria partidu sira ho asentu iha Parlamentu Nasionál  ko’alia ba malu no hatudu momoos ona saída mak sira hakarak. Situasaun ida-ne’e enkoraja Xefe Estadu atu hala’o nafatin diálogu.

Aman nasaun ne’e fiar, iha ona sinál sira ne’ebé hatudu katak Unidade nasionál entre partidu sira  iha Parlamentu haboot  liután ona tanba ida-ne’e mak povu hakarak. Povu hakarak unidade no ukun ida-ne’ebé  permite dezenvolvimentu nasionál  la’o lais liu no fó rezultadu di’ak liután.

“Ha’ u fiar katak, ita hotu hakarak UNIDADE, atu bele hasoru dezafiu boboot sira ne’ebe la’ ós de’it dezafiu Estadu no Governu nian maibé ita-nia nasaun tomak nian,” nia dehan.

Nune’e, tuir nia, bele hare ona situasaun parlamentar foun ida ne’ebé fó dalan ba Primeiru-Ministru foti inisiativa propoin membru Governu foun ba prenxe fatin mamuk sira no ba fatin foun sira tuir mudansa orgánika Governu nian ne’ebé Prezidente Repúblika rasik promulga ona. Ho apoiu hosi maioria parlamentár foun ne’ e, mak Primeiru-Ministru bele hala’o ninia kbiit konstitusionál tomak.

“Husi ha’ u-nia parte, nu’udár Prezidente Repúblika no hafoin haree no tetu didi’ak proposta hosi Primeiru-Ministru, ha’u deside simu proposta sira-ne’e no hosi ha’u-nia hanoin rasik no ha’u-nian de’ it,  maibé haree mós ba ha’ u-nia kbiit konstitusionál mai hosi alínea h) artigu 86 no númeru 2 artigu 106 Konstituisaun RDTL,”  nia subliña.

Ho ida ne’e, nia haktuir, Timor-Leste hakaat daudaun ba oin no kore-aan daudaun ona hosi situasaun ida-ne’ebé konsidera hanesan impase polítiku kona-ba formasaun  VIII Governu Konstitusionál nian.

Prezidente Repúblika mós dekalara, povu hotu hein buat boot no barak hosi Primeiru-Ministru no Governu ida-ne’e.

“Ami hotu hein katak ita la’ ós de’ it sei manán luta hasoru COVID-19 maibé ita sei konsege sai mós hosi situasaun aat mosu ho inundasaun oin-oin iha país tomak. Ami hotu hein mós katak Governu ida -ne’e no Primeiru-Ministru konsege dudu duni ba oin rekuperasaun ekonómika. Ita hotu hatene katak produtu internu brutu tun no falta empregu sátan moris di’ak ba Povu. Maibé ita hotu  mós hatene katak problema sira-nee hotu la’ós foin mosu ho COVID-19. Problema sira ne’e  kleur ona no ita presiza kore-aan hosi problema sira-ne’e atu la husik ita-nia País monu iha resesaun ekonómika,” nia espera.

Nia fóhanoin katak importante tebes hili modelu dezenvolvimentu ekonómiku sosiál ida-ne’ebe foka liuliu  ba ema.

Tanba ne’e, Xefe estadu fó hanoin ba membru Governu ne’ebé foin simu pose ba tama iha momentu ida-ne’ebé Povu halo ezijénsia boboot de’it.

“Povu no Prezidente Repúblika rasik hein katak Ita-Boot sira sei hala’o imi-nia knaar ho dedikasaun, servisu maka’as, espíritu ekipa no responsabilidade,’ nia husu.

Marka prezensa iha serimonia pose ne’e, Prezidente Parlamentu Nasionál Aniceto Guterres, Prezidente Tribunál Rekursu, Deolindo dos Santos, Primeiru Ministru Taur Matan Ruak, deputadu sira, membru atuál oitavu governu, eis primeiru Ministru Mari bim Amude Alkatiri, korpu diplomátiku sira, Xefe Estadu Maiór Jenerál F-FDTL, majór Jenerál Lere Anan Timur, Komandante Jerál Polisia Nasionál Timor Leste, komisáriu Faustino da Costa, Padre Jovito do Rego,  Familia, no konvidadu sira seluk.

Notísia Relevante: Xefe Estadu Husu Membru Governu Foun Komprende Kbiit Laek Sira-Nia Hakarak

Jornalista  : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here