Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 29 maiu 2020 (TATOLI) –Hafoin membru governu (MG) na’in-lima ne’ebé indizita husi partidu Kongresu Nasional Rekonstrusaun Timorense (CNRT, sigla portugés) hatama karta rezignasaun ba Primeiru-Ministru (PM), Taur Matan Ruak, iha Segunda (25/05/2020) liuba, maibé to’o agora sira sei kontinua hala’o hela serbisu nu’udar membru governu tanba hein hela ezonerasaun formál husi Prezidente Repúblika (PR), Francisco Guterres “Lú Olo”.

Notísia Relevante : Membru Governu CNRT Na’in-Lima Hasoru PM Taur, Arsénio: “Desizaun Partidu Tenke Kumpre”

Membru governu husi partidu CNRT nian na’in-lima ne’ebé hatama ona karta rezignasaun hodi kumpre desizaun partidu CNRT nian ne’e maka hanesan, Ministru Negósiu Estranjeiru no Kooperasaun (MNEK), Dionísio da Costa Babo Soares, Ministra Edukasaun Ensinu Báziku, Juventude no Desportu, Dulce Soares, Vise-Ministru Administrasaun Estatál, Abílio Caetano, Sekretáriu Estadu Juventude no Desportu, Nelio Isaac Sarmento ho Sekretáriu Estadu Kooperativa, Arsénio da Silva.

Dionísio da Costa Babo Soares, membru governu ne’ebé indizita husi partidu ne’ebé lidera husi Komandante Ein-Xefe FALINTIL, Kay Rala Xanana Gusmão, ba pasta Ministru Negósiu Estranjeiru no Kooperasaun (MNEK),  sesta ne’e, klarifika ba Ajénsia Tatoli via mensajen Facebook, katak,  iha kuarta liu-ba (27/05/2020), sira-nia parte simu karta ida husi PM Taur Matan Ruak, hodi husu atu mantén lai iha kargu membru governu nian to’o hetan ezonerasaun formál husi Prezidente Repúblika (PR), Francisco Guterres “Lú Olo”.

Dionísio Babo esklarese katak, karta ne’ebé asina rasik husi PM Taur Matan Ruak, hateten, tuir Konstituisaun Repúblika artigu 86 (h) Ministrus sira iha responsabilidade atu hala’o atividade hotu to’o Prezidente Repúblika ezonera formalmente.

Dionísio Babo haktuir tan katak, Prezidente CNRT, Kay Rala Xanana Gusmão, mós orienta ona membru governu husi partidu CNRT nian atu bele prepara no hato’o relatóriu kompletu ba governu bainhira remata ona sira-nia kargu.

“Relatóriu ne’e hato’o antes de sai formalmente husi governu,” hateten Dionísio da Costa Babo Soares.

Responde ba publikasaun mídia balun ne’ebé fó sai dehan, Ministru Dionisio Babo mantein iha governu tanba orientasaun partidu ne’e laloos.

“Durante ne’e, mezmu hato’o ona karta rezignasaun, maibé membru governu sira-ne’e sei hala’o nafatin atividade hodi hein ezonerasaun formál ne’ebé sei hato’o husi Prezidente Repúblika,” tenik Dionísio Babo.

Jornalista   : Eugénio Pereira

Editór           : Francisco Simões

HAKEREK NO HATÁN

Please enter your comment!
Please enter your name here