Membru Governu indijitadu na’in-lima husi Partidu CNRT hala’o enkontru no hato’o karta resignasaun ba Primeiru Ministru, Taur Matan Ruak iha Paláciu Governu, segunda (25/05). Imajen Tatoli/António Gonçalves

DILI, 25 maiu 2020 (TATOLI) – Membru Governu indijitadu husi Partidu Congresso Nacional Reconstrução Timorense (CNRT) na’in-lima hasoru Primeiru-Ministru (PM), Taur Matan Ruak iha Palásiu Governu, segunda ne’e, hodi hatama karta rezignasaun tuir orientasaun partidu.

Membru Governu hirak ne’e maka hanesan Ministru Negósiu Estranjeiru no Kooperasaun, Dionísio da Costa Babo Soares, Ministra Edukasaun, Juventude no Desportu, Dulce Soares, Vise-Ministru Administrasaun Estatál, Abílio Caetano, Sekretáriu Estadu Juventude no Desportu, Nelio Isaac Sarmento, no Sekretáriu Estadu Kooperativa, Arsénio da Silva.

Governante sira ne’e hasoru Xefe Govenu, hafoin Prezidente CNRT, Kay Rala Xanana Gismão deklara liuhosi konferénsia imprensa iha sábadu (23/05) liubá iha sede CNRT, Bairro dos Grilos, katak loron ikus, 25 maiu 2020 ba Membru Governu ne’ebé indijita husi partidu CNRT tenke sai husi estrutura VIII Governu.

Notísia Relevante: 25 Maiu, Loron Ikus ba Membru Governu CNRT Sai husi Governu

Hafoin enkontru, Arsénio da Silva, hateten enkontru ho Xefe Governu ohin tanba tuir orientasaun partidu nian.

Sekretáriu Estadu Kooperativa, Arsénio da Silva. Imajen Tatoli/Nelia Fernandes

“Ami hasoru malu ho Primeiru-Ministru maibé seidauk ko’alia hotu no tuir Primeiru-Ministru reuniaun Konsellu Ministru hotu mak kontinua fali, maibé atu dehan katak desizaun partidu nian tenke kumpre tanba ami mai ne’e partidu mak haruka, ne’ebé partidu haruka atu ami tenke para”, dehan Arsénio.

Tuir observasaun Agência Tatoli nian katak, hafoin enkontru ho Xefe Governu, Sekretáriu Estadu Arsénio da Silva no Ministra Dulce Soares fila no la partisipa ona iha reuniaun KM, enkuantu membru CNRT seluk ne’ebé hasoru PM Taur sei nafatin iha Palásiu Governu hodi partisipa reuniaun ezekutivu.

Tuir ajenda katak, segunda ne’e Primeiru-Ministru, Taur Matan Ruak prezide reuniaun KM estraordinária ne’ebé realiza iha Palásiu Governu iha tuku 10:00, maibé antes realiza reuniaun ezekutivu ne’e, Xefe Governu realiza sorumutu ho Membru Governu indijitadu Partidu CNRT iha tuku 09:00.

Partidu CNRT antes ne’e, iha loron 11 maiu, deklara retira hosi VIII Governu Konstitusionál no deside kuadru partidu ne’ebé envolve iha Governu atuál atu rezigna-an.

Kuadru CNRT seluk ne’ebé envolve iha VIII Governu Konstitusionál mak hanesan Ministru Estadu Prezidénsia Konsellu Ministru, Hermenegildo Augusto Cabral Pereira, Sekretáriu Estadu Arte no Kultura, Teófilo Caldas, no Sekretáriu Estadu Asuntu Kombatente Libertasaun Nasionál, Gil da Costa Monteiro ‘Oan Soru’.

Membru Governu hirak ne’e hetan pose hamutuk ho membru seluk iha loron 22 jullu 2018.

Iha mandatu VIII Governu Konstitusionál, sei iha pasta sia mak seidauk hetan pose nu’udar Membru Governu indijitadu husi Partidu CNRT maka hanesan Francisco Kalbuadi Lay, Helder Lopez, Virgílio Smith, Jacinto Rigoberto, Tomás Cabral, José Turquel, Amandio de Sá Benevides, enkuantu Kay Rala Xanana Gusmão antes ne’e rezigna-an.

Membru Governu seluk ne’ebé indijitadu husi partidu KHUNTO no seidauk hetan pose maka António Verdial (rezigna-an).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here