Diretór Estabelesimentu Prizaun Becora, João Domingos. Imajen/Dok. Tatoli

DILI, 28 maiu 2020 (TATOLI) – Diretór Guarda Prizionál  Becora, João Domingos, reprezenta Guarda Prizaun Becora, husu ba governu liuhusi Ministériu Justisa (MJ) atu konsidera  insentivu suplementu ka subsídiu ba mós Guarda Prizionál  tanba durante estandu emerjénsia kontinua ejerse funsaun.

Notísia Relevante : SS-CIGC ho Maluk Timor Fó Formasaun Kona-ba Medida Prevensaun COVID-19 ba Guarda Prizionál Becora

João Domingos hateten, maske iha estadu emerjénsia, maibé Guarda Prizionál kontinua kuidadu no tau matan ba prizioneiru sira, inklui serbisu hamutuk ho parte saúde liu-liu iha prizaun-laran halo diagnostika ba prevensaun propagasaun surtu Coronavirus COVID-19.

“Maluk Guarda Prizionál sira kestiona osan insentivu ne’e,” hateten Diretór João Domingos  ba jornalista iha Prizaun Becora, Dili, kinta (28/05/2020).

Nia parte halo ona pedidu ba Diretór Nasional Reinsersaun Sosiál, Ministériu Justisa, nune’e bele hato’o ba Ministru Justisa Manuel Cárceres hodi haree kestaun ne’e.

João Domingos hateten, desizaun governu nian ba insentivu ba pesoál sira frontline luta hasoru COVID-19 hanesan médiku, PNTL, F-FDTL, EDTL ho pesoál saneamentu sira, maibé presiza mós sura ho Guarda Prizionál tanba maske la hala’o kna’ar direita ba pasiente COVID-19 maibé kontribui mós ba prevensaun.

Ministériu Justisa estabelese ona prizaun tolu hanesan Prizaun Becora iha Dili, Prizaun Gleno iha Ermera no Prizaun Suai iha Covalima ho nia Guarda Prizionál nain-200 resin.

Hatán ba preokupasaun ne’e, Diretora Jerál Administrasaun Diresaun Jerál Polítika no Justisa, Marcelina Tilman da Silva hateten, politikamente atu konsidera ba pesoál Guarda Prizionál sira nian ne’e kabe ba kompeténsia Ministru Justisa Manuel Cárceres da Costa atu deside.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here