SS-CIGC ho ONG Maluk Timor fó formasaun kona-ba medida prevensaun COVID-19 ba Guarda Prizionál Prizaun Becora, Dili. Imajen/Nelson de Sousa

DILI, 28 maiu 2020 (TATOLI) – Sala Situasaun Sentru Integradu Jestaun krize (SS-CIGC) ho Organizasaun Naun Governmental (ONG) Maluk Timor fó formasaun kona-ba medida prevensaun COVID-19 ba Guarda Prizionál Prizaun Becora, Dili.

Formasaun ne’ebé hala’o loron tolu; kinta-sábadu (28-30/05/2020), partisipa husi guarda prizaun 100-resin ne’ebé fahe ba turnu kada loron na’in-30-resin.

Formadór husi ekipa SS-CIGC ho ONG Maluk Timor sei aprezenta substánsia matéria kona-ba saida mak Coronavirus no via transmisaun, nune’e mós oinsá ninia maneira prevensaun tuir orientasaun Ministériu Saúde Organizasaun Mundial Saúde (OMS) nian.

Diretór Prizaun Bekora João Domingos, agradese ho formasaun ne’e no nia konsidera importante tebes hodi hasa’e liután koñesimentu guarda sira nian hodi kontribui luta konta inimigu invizivel COVID-19 iha Timor-Leste.

Hafoin formasaun ne’e, guarda iha obrigasaun atu transmite fila-fali matéria sira ne’e ba prezu sira, atu bele hamutuk prevene surtu COVID-19.

Reprezentante Médiku husi ONG Maluk Timor, Tarsija Roza hateten, Maluk Timor hanesan ONG ida haree ba asuntu saúde iha nia papél oinsá mak bele kontribui hasa’e kapasidade no kualidade serbisu saúde iha Timor-Leste hodi responde ba luta kontra COVID-19.

“Kontente bele mai fahe informasaun ba Guarda Prizionál sira. Mai ita hotu hamutuk luta kontra COVID-19 iha ita-nia rain,”  Tarsija Roza hateten.

Tuir observasaun Ajénsia Tatoli nian iha Prizaun Becora bainhira vizitante ka bainaka sira  atu tama aredór Prizaun nian tenke submete uluk ba dezinfeta  no fase-liman ho sabaun ne’ebé prepara ona.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here