Vise Ministru Negósiu Estranjeiru Japaun, AKIBA Takeo, kaer-liman ho Embaixadór Ilídio Ximenes da Costa. Imajen/Embaixada TL ba Japaun

DILI, 28 maiu 2020 (TATOLI) – Embaixadór Timor-Leste ba Japaun, Ilídio Ximenes da Costa, hahú komunika ho governu Japaun no setór privadu balun iha Japaun atu bele mai investe iha Timor-Leste.

Notísia Relevante : Estudante Timoroan iha Japaun Sosa Hand Sanitizer Fó Ba Igreja

Iha janeiru too marsu liubá,  eis Sekretáriu Estadu Polítika Formasaun Profisionál no Empregu (SEPFOPE) ne’e hahú hala’o ona enkontru ho Vise Ministru Negósiu Estranjeiru Japaun, AKIBA Takeo, hodi diskute programa planu konstrusaun ba Aeroportu Internasionál Prezidente Nicolau Lobato.

Vise Ministru Negósiu Estranjeiru Japaun AKIBA Takeo rasik simu idea ida ne’e pozitivamente deklara katak, Japaun nafatin iha kometimentu atu ezekuta konstrusaun ba Aeroportu Internasionál ne’e hodi aloka Millaun $44, ninia kontinuasaun to’o momentu ida ne’e hein de’it konsultasaun no koordenasaun ho governu Timor-Leste.

Ilídio Ximenes  ho Vise Ministru AKIBA Takeo diskute mós kooperasaun bilaterál, trilateral  no multilaterál no AKIBA Takeo rasik deklara serbisu bilaterál ne’ebé iha ona durante ne’e sei kontinua hala’o nafatin hanesan uluk nian, no iha mós programa foun hodi haruka traballadór Timor-oan sira ne’ebé hakarak atu ba serbisu iha Japaun sei realiza iha tempu besik.

“Ha’u hala’o mós enkontru ho señor AKIBA Takeo deklara Japaun iha nafatin kometimentu hodi apoia Timor-Leste,” informa  Ilídio Ximenes  ba Ajénsia Tatoli liuhusi mensajen  WhatsApp, kinta (28/05/2020).

Ilídio Ximenes informa mós kona-ba difikuldade ne’ebé TL enfrenta iha Sentru Formasaun sira ne’ebé la iha rekursu umanu no fasilidade ba treinamentu konstrusaun sivíl nian, nune’e nia implikasaun ba posibilidade demanda merkadoria. Tanba, operadór no mekániku ba ekipamentu pezadu no konstrusaun ne’ebé halo serbisu iha TL kuaze domina husi ema rai-li’ur hanesan Indonézia no Filipina.

Iha okaziaun ne’e, embaixadór Ilídio Ximenes kontinua haree tuir fali ba planu kooperasaun trilateral entre nasaun tolu mak TL, Japaun no Indonéziu iha setór marítima, peska no turizmu.

Diplomata Timoroan ne’e kontinua husu apoia governu Japaun ba TL nia planu no preparasaun hodi adere no sai membru ba Organizasaun Mundiál Komérsiu (sigla ingles WTO) no Asosiasaun Nasaun sira iha Sudeste Aziátiku (sigla ingles, ASEAN).

Japaun liuhusi Vise Ministru Negósiu Estranjeiru iha kometimentu atu kontinua suporta TL hodi sai membru ASEAN no sei kontinua programa sira ne’e hala’o tiha ona hanesan bolsu estudu no dezenvolvimentu infrastrutura ne’ebé iha ona konkordata.

Iha oportunidade ne’e, AKIBA Takeo mós husu kona-ba pozisaun Timor-Leste nian iha Free Indo Pacific. Programa seluk tuir mai sei diskute kontinuamente ho TL iha meza Ministériu Negósiu Estranjeiru (Sigla ingles, MOFA) nian.

Seidauk Aprezenta Karta Kredénsia

Parte seluk, Ilídio Ximenes informa, depois simu pose husi Prezidente Repúblika, Francisco Guterres “Lú Olo” iha loron 28 Janeiru 2020, too loron 09 Marsu 2020, Ilídio mós simu ligasaun kortezia husi Vise Ministru Negósiu Estranjeiru, AKIBA Takeo, hodi entrega karta kredénsia husi Presidente Repúblika, Francisco Guterres “Lú Olo” hodi bele prosesa ba iha Palásiu Real.

Husi hasoru malu ne’e, embaixadór hetan autorizasaun hodi bele hala’o atividade no partisipa iha eventu saida de’it exeptu proibe atu hasoru malu iha Palásiu Liurai nia no mós ho família Liurai nian, tanba problema COVID-19 mosu mós iha Japaun.

“Too agora ha’u rasik seidauk entrega karta kredénsia ba Sua-Exelénsia  Liurai Japaun, tanba Governu Japaun rasik fó sai regulamentu ba diplomata sira kontinua koopera hodi hein too COVID-19 livre ona iha Japaun foin bele autoriza embaixadór sira entrega karta,” Ilídio informa.

Reuniaun seluk tan mak, iha loron 05 Marsu, Ilídio konvida Embaixadór Japaun ba Timor-Leste, KINEFUCHI hodi aprezenta kona-ba programa sira ne’ebé governu rai rua halo no ajénsia privadu no polítiku sira molok hakaat ba Japaun.

Ilídio husu atu TL no Japaun kontinua haree tuir fali ba planu hodi haruka traballadór sira husi Timor-Leste atu ba serbisu iha Japaun.

“Ami diskute nafatin mós oinsá maka hametin kooperasaun hodi simu ita-nia traballadór sira mai servisu iha Japaun,” Ilídio Ximenes hateten.

Embaixadór KINEFUCHI mós husu nia omólogu Embaixadór Ilídio atu hasoru ho JETRO hodi hetan informasaun detallu, nune’e bele realiza programa refere. KINEFUCHI mós dehan, bainhira to’o Timor-Leste nia sei haree no halo diskusaun barak ho nia ekipa iha Dili kona-ba demanda ne’ebé hato’o ona.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here