Embaixadór Timor-Lest ba Japaun, Ilídio Ximenes da Costa. Imajen/Egas Cristóvão

DILI, 28 maiu 2020 (TATOLI) – Estudante Timoroan sira ne’ebé daudaun ne’e halo estudu iha Japaun koopera ho Embaixada Timor-Leste iha Japaun, halo asaun solidariedade hodi tau osan hamutuk sosa ekipamentu hanesan, hand sanitizer ka sabaun hodi apoia Igreja balun iha Dili bele fasilita sarani sira fase liman bainhira ba misa.

Embaixadór Timor-Leste ba Japaun, Ilídio da Costa Ximenes, ba Ajénsia Tatoli via mensajen  WhatsApp,  esklarese katak, inisiativa ne’e hala’o husi Estudante Timoroan na’in-14 ne’ebé lidera husi estudante  na’in lima hanesan, Patricia, Gito, Mariani, Manuel no Olderico Silva maka organiza hodi halibur osan montante $609.31

Asaun solidariedade ne’e hala’o, hafoin Igreja Katólika liuhusi Konferénsia Episkopál Timorense ne’ebé fó sai ona katak, iha loron 28 maiu 2020, Igreja deside atu loke fali selebrasaun Eukaristia hanesan baibain. Tanba ne’e, estudante sira fó apoia para ajuda Igreja fasilita sarani sira ba misa bele fase-liman hodi prevene husi propagasaun surtu Coronavirus ka COVID-19.

“Apoia ne’e ita-nia alin estudante na’in-14 koopera ho embaixada fó para ajuda Igreja oinsá prepara hand sanitizer ka sabaun no bee hodi sarani sira ba misa bele fase-liman para prevene COVID-19,” hateten  Embaixadór Ilídio Ximenes.

Daudaun ne’e Estudante Timoroan hamutuk 38 maka halo estudu iha Japaun no envolve mós funsionáriu sira iha Embaixada nu’udar Timoroan fó apoiu mezmu kuantidade apoiu ne’e ki’ik, maibé Timoroan hatudu sira-nia solidariedade hodi ajuda malu.

Nia dehan, osan ne’e rasik estudante sira transfere ona mai Timor-Leste no ekipa balun iha Dili sei mobiliza hodi sosa sasán no fahe ba Igreja balun iha Dili.

Parte seluk, Ilídio informa, mezmu COVID-19 akontese iha Japaun, maibé kondisaun Timoroan sira di’ak no la iha estudante ruma maka sofre moras. Estudante sira halo estudu liuhusi online no Governu Japaun rasik fó apoiu orsamentu ba ninia estudante sira inklui mós estudante Timoroan sira.

“Ita apresia Governu Japaun fó subsídiu ba sira-nia estudante hotu, inklui ita-nia estudante Timoroan sira,” Ilídio hateten.

Embaixadór Ilídio Ximenes mós apresia, ho eis Embaixadór Japaun ba Timor-Leste, I Wao Kitahara, konsege halo komunikasaun ho Governu Japaun hodi fó apoiu fundus no apoia materiál saúde mai Governu Timor-Leste ho Cruz Vermella de Timor-Leste (CVTL) hodi luta kontra propagasaun surtu COVID-19.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here