Atividade Petrolífera iha Kampu Bayu-Undan. Imajen/Conocophillips

DILI, 28 maiu 2020 (TATOLI) – ConocoPhillips deklara finaliza ona prosesu fa’an ativu petrolífera ne’ebé lokaliza iha Norte Austrália ba Kompañia Petrolífera Australiana, Santos Limited.

Santos deside sosa asaun Conocophillips ho montante biliaun $1,4, maibé prosesu akizisaun foin maka finaliza ohin loron.

Conocophillips fa’an ninia interese operasionál iha planta prosesamentu Liquefied Natural Gas (LNG) Darwin iha Kampu Bayu-Undan, Barossa no Poseidon.

Interese ne’ebé tama iha akizisaun ativu ConocoPhillips maka hanesan negósiu ne’ebé envolve iha kampu Bayu-Undan, rezerva seluk inklui mós eskritóriu iha Perth, Darwin no mós iha Dili.

“Ohin ami finaliza ona prosesu hodi fa’an ConocoPhillips nia ativu no operasaun sira iha Norte Austrália ba Santos Limited. Ida-ne’e signifika katak Santos mak agora nu’udar operadór ba projetu Bayu-Undan nian”, refere nota imprensa ne’ebé Agência Tatoli asesu liuhosi pájina ConocoPhillips, kinta ne’e.

Notísia Relevante: Conocophillips Aprezenta Reprezentante Santos Ltd ba Governu

ConocoPhillips mós espresa sentimentu durante hamutuk ho kompañia seluk halo operasaun iha kampu Bayu-Undan hodi esplora mina no kontribui ba dezenvolvimentu Timor-Leste.

“Ami-nia jornada ne’e la sees hosi dezafíu, inklui atuál krize COVID-19 nian. Maski nune’e, liuhosi serbisu ho forma kolaborativu ami konsege halo ona progresu signifikativu no harii kapasidade lokál liuhosi empregu no formasaun, bens no servisu no mós inisiativa ba investimentu komunitária nian”, relata nota ne’e.

Biban ne’e, ConocoPhillips sente orgullu bele hola parte iha projetu Bayu-Undan hodi kontribui ba ekonomia Timor-Leste, liuliu ba fundu petrolíferu hamutuk biliaun $20 resin.

“Ami hakarak aproveita oportunidade ida-ne’e hodi agradese ba Governu no mós povu Timor-Leste ba ita-boot sira-nia kontribuisaun ba susesu projetu Bayu-Undan nian”, subliña.

Hafoin retira husi projetu Bayu-Undan, ConocoPhillips sei konsentra ba projetu iha Australia Pacific LNG iha Queensland.

Sorin seluk, Santos Limited anunsia finaliza ona akizisaun ho ConocoPhillips.

“Ohin Santos anunsia katak ami finaliza ona akizisaun ba ConocoPhillips nia ativu iha Austrália no Timor-Leste. Enkuantu ami sai ona parseiru ida iha projetu Bayu-Undan nian, Santos mak agora nu’udar operadór. Ami sente haksolok tebes atu simu ami-nia forsa traballu foun hosi Timor-Leste mai iha Santos”, refere kompañia australiana ne’e liuhosi pájina.

Tuir Santos, prioridade hafoin hamutuk iha Bayu-Udan maka atu garante operasaun ne’ebé seguru.

“Ami sei kontinua servisu iha kolaborasaun besik ho povu no Governu Timor-Leste hodi nune’e sira bele kompartilla benefísiu ba dezenvolvimentu gás naturál nian”, salienta.

Iha loron 28 agostu 2019, Governu asina kontratu foun ho kompañia 10 ne’ebé atu halo esplorasaun iha Área Dezenvolvimentu Petrolíferu Konjunta (JPDA, sigla inglés) iha kampu Bayu-Undan.

Kompañia hirak ne’e maka ConocoPhillips, INPEX, Tokoyo Timor Sea Resources, Eni, Santos Ltd, CARNARVON Petroleum Lda, REPSOL, TIMOR GAP (empreza estatál), NOPSEMA, no Department of Industry Innovation and Sience Australia.

ConocoPhillips introdús ona kompañia Santos ba Governu Timor-Leste tanba iha loron 13 outubru 2019, ConocoPhillips anúnsia sei fa’an ninia negósiu Norte Austrália ne’e no bainhira prosesu tranzasaun ramata, sei husik Timor-Leste.

Bainhira prosesu tranzasaun ramata no ConocoPhillips sei husik Timor-Leste no ninia prezensa sei troka ho Santos Limited.

Iha sorin seluk, Governu Timor-Leste iha abríl 2019, foin konklui prosesu fa’an no sosa partisipasaun konsórsiu ConocoPhillips iha kampu Greater Sunrise ho pursentu 30.

Partisipasaun ne’e Governu sosa ho valór millaun $350, nune’e bele hetan direitu esplorasaun iha kampu Greater Sunrise.

Parseiru korsórsiu iha Greater Sunrise antes ne’e maka Woodside (operadora) ho partisipasaun ho porsentu 33,4, ConocoPhillips ho porsentu 30, Shell ho porsentu 26,6 no Osaka Gas  ho porsentu 10.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here