Reprezentante ConocoPhillips no Santos Ltd, ne’ebé kompostu husi Prezidente Unidade Negósiu Austrália Osidentál husi ConocoPhillips, Chris Wilson, Jerente Nasionál ConocoPhillips, José Lobato Gonçalves no delegasaun, hasoru malu ho Ministru Estadu Prezidénsia Konsellu Ministru no Ministru Petróliu no Minerál ein ezesísiu, Hermenegildo Augusto Cabral Pereira, iha Palásiu Governu, segunda (29/10). Imajen TATOLI/Hortençio Sanchez

DILI, 29 outubru 2019 (TATOLI) – Reprezentante Conocophillips iha Timor-Leste aprezenta Kompañia Petrolífera Australiana, Santos Ltd ba Ministru Estadu Prezidénsia Konsellu Ministru no Ministru Petróliu no Minerál ein ezesísiu, Hermenegildo Augusto Cabral Pereira, nu’udar parseiru dezenvolvimentu Governu.

Vizita kompañia rua ne’e ba Governu, ba dahuluk hafoin Santos Ltd deside sosa asaun Conocophillips ho montante biliaun $1,4.

Conocophillips fa’an ona ninia interese operasionál iha planta prosesamentu Liquefied Natural Gas (LNG) Darwin no Kampu Bayu-Undan, Barossa no Poseidon, nune’e konkluzaun husi prosesu transasaun ne’e sei akontese durante trimestre dahuluk tinan 2020.

Jerente Nasionál Conocophillips, José Lobato Gonçalves, informa vizita ne’e atu aprezenta kompañia foun.

“Ohin hasoru malu ho Governu ho objetivu atu introduz kompañia Santos nu’udar autoridade iha Timor-Leste. Kompañia Santos envolve ona iha operasaun kampu Bayu-Undan desde inísiu no nia mós nu’udar joint venture iha Bayu-Undan”, nia tenik iha Palásiu Governu, segunda ne’e.

Notísia Relevante: Governu Asina Kontratu Foun ho Kompañia 10 Ne’ebé Halo Esplorasaun Iha Área JPDA

Antes ne’e, iha loron 28 agostu 2019, Governu asina kontratu foun ho kompañia 10 ne’ebé atu halo esplorasaun iha Área Dezenvolvimentu Petrolíferu Konjunta (JPDA-sigla inglés) iha kampu Bayu-Undan.

Kompañia hirak ne’e maka ConocoPhillips, INPEX, Tokoyo Timor Sea Resources, Eni, Santos Ltd, CARNARVON Petroleum Lda, REPSOL, TIMOR GAP (empreza estatál), NOPSEMA, no Department of Industry Innovation and Sience Australia.

Nia esplika, razaun mai introduz kompañia Santos ba Governu tanba iha loron 13 outubru liubá, ConocoPhillips anúnsia sei fa’an ninia negósiu Norte Austrália ne’e no bainhira prosesu tranzasaun ramata, ConocoPhillips sei husik Timor-Leste.

“Negósiu sira ne’ebé envolve inklui Bayu-Undan, rezerva sira seluk inklui mós eskritóriu iha Perth, Darwin no mós iha Dili. Prosesu tranzasaun rasik sei lori tempu to’o fulan hirak nia laran. Entaun trimestrál dahuluk 2020, tranzasaun ne’e sei ramata no ConocoPhillips sei husik Timor-Leste no ninia prezensa sei troka ho Santos”, nia akresenta.

Notísia Relevante: Kompañia 10 Ne’ebé Esplora Mina iha Bayu Undan Selu Taxa Direta bá Estadu TL

Bazeia ba públikasaun ne’ebé ConocoPhillips deklara iha semana kotuk liubá hatudu katak ba oin partisipasaun hotu iha kampu Bayu-Undan sei kontrola hotu hosi Santos Ltd.

Governu Timor-Leste iha abríl 2019, foin konklui prosesu fa’an no sosa partisipasaun konsórsiu ConocoPhillips iha kampu Greater Sunrise ho pursentu 30.

Partisipasaun ne’e Governu sosa ho valór millaun $350, nune’e bele hetan direitu esplorasaun iha kampu Greater Sunrise.

Parseiru korsórsiu iha Greater Sunrise antes ne’e maka Woodside (operadora) ho partisipasaun ho porsentu 33,4, ConocoPhillips ho porsentu 30, Shell ho porsentu 26,6 no Osaka Gas  ho porsentu 10.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here