Prezidente Repúblika, Francisco Guterres Lú Olo. Imajen António Gonçalves

DILI, 27 maiu 2020 (TATOLI)–Xefe Estadu Francisco Guterres “Lú Olo” hato’o lia-menon ba deputadu sira iha Parlamentu Nasionál (PN) atu kontinua hametin liután sentidu unidade no domin ba povu Timor-Leste.

Notísia Relevante: EE Faze Toluluk Foku De’it Ba Aspetu Tolu

“Dala tolu ona mak ha’u mai hato’o lia menon ba Ita-Boot sira, Señoras no Señores Deputadus, hodi apela ba Ita-Boot sira-nia sentidu unidade no domin ba Povu Timor-Leste. Ho ita-nia hahalok hamutuk mak ita valoriza sakrifísiu  sira-ne’ebé ita hotu halo  ba ita-nia Timor-Leste, ita-nia Pátria ka ita-nia uma-kain boot ida-ne’e. Seidauk to’o tempu atu ita selebra vitória. Ita-nia luta susar hasoru moras ne’e sei la’o nafatin hela. Luta ida-ne’e la’ós de’it  Povu Timor-Leste nian maibé mós Umanidade tomak nian,” PR “Lú Olo” husu ne’e, liuhosi mensajen Prezidente Repúblika ba Parlamentu Nasionál kona-ba Renovasaun ba deklarasaun estadu emerjénsia ba territóriu nasionál tomak, tuir artigu 85 alínea g) hosi Konstituisaun Repúblika Demokrátika Timor-Leste, hahú hosi  28 -Maiu to’o 26 Juñu 2020.

Xefe Estadu hateten, tinan ida-ne’e la hanesan ho tinan hirak liubá, la’ós de’it ba Timor-Leste maibé mós ba Mundu tomak. Tanba moras COVID-19 sei la’o nafatin iha mundu, maka PR “Lú Olo”  dirije dala ida tan ba Magna Asembleia ida-ne’e.

Nia hatutan, Coronavirus foun hanaran SARS-CoV-2 mak hamosu pandemia COVID-19 ne’ebé kontinua fó terus ba ema barak iha mundu, la fihir país riku ka kiak.

“Kona-ba moras foun ne’e, Nasaun sira-nia situasaun la hanesan. Ha’u haree Nasaun balun hanesan rekupera dadaun hosi pandemia ne’e, balun  hasoru fila fali moras ne’e, no balu seluk tama iha períodu ida ne’ebé krítiku tebe-tebes. Iha país ida-nia laran, bele mosu situasaun oin-oin,” nia subliña.

Aman nasaun ne’e hatutan, pandemia ida ne’e lori ema hotu atu hanoin ba oinsá presiza moris ohin loron. Lisaun ida ne’ebé hasai hosi pandemia ne’e mak ema ida-idak tenki moris ligadu liután ba ema seluk. Katak, ema moris iha ligasaun liután ba malu no depende liután ba malu.

Nia haktuir, Vírus ida ne’ebé mosu uluk iha Repúblika Populár Xina iha tinan kotuk nia rohan, oras ne’e hada’et tiha ona iha mundu tomak.

“Pandemia ne’e mós hanorin ona mai ita katak ita bele manán bainhira ita hotu fó liman ba malu.   Biar ita la hetan kazu pozitivu COVID-19, ita labele husik lai kampu batalla tanba luta ne’e seidauk to’o rohan. Se ita husik agora, ita sei hamonu sakrifísiu sira-ne’ebé ita halo tiha ona.  Ita labele husik tanba ita seidauk manán luta ne’e iha ita nia rain no rai sira seluk mós seidauk manan. Tanba Povu Timor-Leste hatudu sentidu responsabilidade aas no respeitu mak  ha’u fiar katak ita sei manán duni ita-nia luta hasoru inimigu komún ida ne’e,” Xefe estadu louva.

Aman nasaun ne’e konfia katak, liuhosi esforsu no kolaborasaun hosi sidadaun sira, entidade públika sira, organizasaun nasionál no internasionál sira iha Timor-Leste, mak bele konsege ona identifika kazu infesaun hotu-hotu ho SARS-CoV-2 ne’ebé tama hosi rai-li’ur, asegura izolamentu terapéutiku ba sira-ne’ebé infetadu, prevene infesaun ne’e atu labele da’et ba komunidade sira no halakon virus ne’e iha rai-laran.

“Sentidu responsabilidade ida ne’e, hosi ita-nia Povu doben, fó orgullu boot ba ha’u. Ba  Povu ha’u hato’o obrigadu barak,” nia dehan.

Notísia Relevante: Xefe Estadu Husu Autorizasaun PN Ba Estensaun Estadu Emerjénsia

Jornalista : Cipriano Colo

Editór       : Cancio Ximenes 

HAKEREK NO HATÁN

Please enter your comment!
Please enter your name here