DILI, 27 maiu 2020 (TATOLI)–Xefe Departamentu Jestaun Merkadória Administrasaun Munisípiu Dili (DJMAMD), Berta Santa Goncalves Vieira, husu ba governu liuliu Autoridade Munisípiu Dili (AMD) atu tau importansia ba guarda jestaun merkadória no funsionáriu kontratadu sira ne’ebé durante ne’e kontinua hala’o servisu iha Estadu Emerjénsia ba propagasaun COVID-19 ne’e.
“Ami atu dehan de’it ami-nia servisu tenke haree no tau matan de’it tanba ami iha ne’e funsionáriu kontratadu mak barak. Tanba ne’e, ha’u husu ba Autoridade Munisípiu Dili atu tau importansia ba sira ne’ebé kontratadu,” dehan Xefe Departamentu Jestaun Merkadória Administrasaun Munisípiu Dili, Berta Santa Goncalves Vieira, ba Ajénsia TATOLI iha nia servisu fatin, Mascarenhas, Dili, kuarta ne’e.
Nia esplika, ekipa jestaun hala’o knaar tuir orientasaun hosi Ministériu Administrasaun Estatál (MAE) no Autoridade Munisípiu Dili nian tanba ekipa mantein servisu iha terenu.
“Ita hanesan funsionáriu públiku no ajente administrativu tenke hala’o de’it servisu ne’ebé mak orienta hosi leten. Maibé ha’u fiar katak hosi Ministériu Administrasaun Estatál (MAE) no Autoridade Munisípiu Dili parese sei haree ba kestaun hirak ne’e,” nia husu.
Nia hatutan, ekipa guarda jestaun merkadória sira nunka falta loron ida durante Estadu Emerjénsia (EE) ba daruak nian iha situasaun propagasaun surtu COVID-19 ne’e nia laran.
“Agora atu tama tan ba Estadu Emerjénsia datoluk mós ami-nia ekipa laharee ba Estadu Emerjénsia. Maibé, ami haree liu mak servisu iha terenu atu oinsa mak bele kontrolu vendedór sira ne’ebé faan la tuir regra, liuliu ba sira ne’ebé okupa dalan públiku,” nia dehan.
Nia informa, ekipa jestaun merkadória Munisípiu Dili hamutuk ema na’in-96 ne’ebé kompostu hosi funsionáriu kontratadu iha ema na’in-53 no funsionáriu permanente iha ema nain-43.
Notísia Relevante: COVID-19, Ekipa Jestaun Merkadória Kontinua Halo Kontrolu ba Merkadu iha Dili
Jornalista : Osória Marques
Editór : Cancio Ximenes
