Xefe Departamentu Jestaun Merkadu Guarda Munisipiu Dili, Berta Santa Goncalves Vieira. Imajen/Egas Cristovão

DILI, 27 maiu 2020 (TATOLI)–Xefe Departamentu Jestaun Merkadória Munisípiu Dili, Berta Santa Goncalves Vieira, hateten maski iha situasaun surtu COVID-19 no Estadu Emerjénsiania laran maibé  ekipa Jestaun Merkadória Munisípiu Dili kontinua halo kontrolu ba merkadu sira iha Dili inklui dalan públiku sira ne’ebé negosiante sira faan sasan ba.

“Ami-nia ekipa jestaun merkadória laharee ba moras COVID-19 ne’ebé mundu tomak afeta inklui Timor-Leste maibé ami kontinua servisu no halo kontrolu hanesan baibain tanba ami funsionáriu jestaun merkadória nian hala’o servisu ida-ne’e loron-loron,” dehan Xefe Departamentu Jestaun Merkadória Munisípiu Dili, Berta Santa Goncalves Vieira, Ajénsia TATOLI iha nia servisu fatin, Matadouro, Dili, kuarta ne’e.

Nia hatete, agora daudaun negosiante sira faan nakonu tiha iha Sidade Dili tanba ho razaun katak Estadu Emerjénsia laiha buat ida maibé sei kontrola nafatin sira-nia atividade faan ne’e.

“Maibé sira faan iha merkadu ne’ebé Governu prepara mak ami la duni sira. Bainhira sira ne’ebé mak kontinua faan iha dalan públiku, ami sei lahusik sira faan no ami tenke prende sasán no duni sira, tanba bazeia ba artigu 33/2008 katak laiha ema ida mak halo negósia arbiru iha dalan públiku,” nia adianta.

Tuir nia. guarda jestaun merkadória mós kontinua halo kontrolu ba vendedór-kompradór sira hodi kumpre regra ne’ebé Estadu dekreta ona.

“To’o agora ha’u rasik ho ekipa patroliamentu kontinua kontrola ba merkadu sira nune’e ita-nia kompradór-vendedór bele mantein distansiamentu fíziku no sosiál no fase liman beibeik ho sabaun. Ttenke distánsia metru ida hoi ema ida ho ema seluk, ne’ebé mak ita-nia Governu anúnsia ona,” nia esplika.

Nia hateten, Jestaun Merkadória Munisípiu Dili mós autoriza ona ba Koordenadór seguransa merkadu nian katak bainhira vendedór sira mak lakumpre regra haruka sira labele faan iha merkadu tanba moras COVID-19 ne’e perigozu ba ema nia vida.

Aleinde ida ne’e, Xefe Jestaun Merkadória hatete, sira sempre hasoru dezafiu bainhira hala’o atividade kontrolu iha merkadu ka dalan públiku hanesan vendedór sira hasai liafuan ladi’ak no tarata sira no dala ruma mós tuda. Maibé, nia dehan, guarda jestaun merkadória simu ho pasiénsia tanba ida-ne’e jestaun merkadória nia servisu.

Nia dehan, Estadu Emerjénsia estende atu ba dala tolu ona maibé ekipamentu protesaun COVID-19 nian ba guarda jestaun merkadória kompletu tanba hetan apoiu hosi Munisípiu Dili rasik.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here