Tanke Bee-Moos Tohu-Meta, iha Suku Tohu-Meta, Postu Administrativu Laulara, Munisípiu Aileu. Imajen Espesiál.

DILI, 27 maiu 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira informa, ho akontesimentu komunidade sira haris fali iha bee mota ulun Tohu Meta mak parte Servisu Água no Saneamentu (SAS) halo karta no haruka ona ba Administradór Postu Administrativu Aileu atu servisu hamutuk.

Nia hatutan, ho karta ida-ne’e Governu iha hanoin ida atu no sei bele monta postu seguransa iha fatin refere atu nune’e bele proteje no asegura fatin no bee mota-ulun Tohu Meta.

“Ami iha ona hanoin nune’e ba oin atu tau seguransa ba bee mota ulun Tohu Meta nian. Ami haruka ona karta ba administradór Postu Aileu nian tanba fatin ne’e parte Aileu nian. Nune’e oinsa servisu hamutuk atu proteje fatin ne’e tanba fatin ne’e pretejidu hodi nia mak lori bee mai iha kapitál Dili. Tanba atu asegura nia kualidade no kuantidade bee presiza iha seguransa,” dehan Francisco Xavier Pereira ba Sjénsia TATOLI iha nia servisu fatin, Caicoli, Dili, kuarta ne’e.

Relasiona ho movimentu ema no haris iha fatin Tohu Meta, nia hatutan, operadór bee mota-ulun Tohu Meta iha ema na’in tolu maibé populasaun barak liu entaun sira labele atua tanba ema barak nia forsa liu sira entaun populasaun vontade hodi tama-sai hodi haris.

“Maibé agora ami garante ona tanba iha kuadru avizu ne’ebé esplika no ema barak mak komprende ona nune’e to’o agora ami-nia operadór hosi bee mota-ulun Tohu Meta nian informa mai ami katak ema la asesu ona ba fatin ne’e,” nia dehan.

Oras ne’e daudaun, nia informa, movimentu ema iha bee mota-ulun Tohu Meta nian ladún iha tanba Governu liuhosi Servisu Água no Saneamentu (SAS) monta ona kuadru avizu hodi asegura no proteje hosi komunidade sira iha área ne’ebá.

“Ami monta ona kuadru avizu iha bee mota-ulun Tohu Meta nian iha segunda (25/05/2020) horisehik. Ha’u rasik telefone ba ita-nia operadór SAS nian ne’ebá ne’e, ne’ebé durante ne’e haree, kuidadu no hamoos fatin ne’e. Nia dehan, to’o agora laiha ona movimentu ema iha ne’e tanba sira haree kuadru avizu no komprende ona. Iha ema balun mak sei movimentu iha fatin refere ne’e tanba sira ne’e ba toos ka halo atividade seluk no la’ós ba haris,” nia dehan.

Nia hatutan, ho kuadru avizu ne’ebé SAS monta iha fatin refere sei garante, asegura no proteje bee mota-ulun Tohu Meta iha futuru mai.

Tanba, tuir nia, ho maneira ida-ne’e mak bele garante entermus ninia kualidade no kuantidade bee no ninia kontinuidade bee hosi bee matan Tohu Meta nian hodi bele fornese bee ba komunidade sira iha Kapitál Dili nian.

Notísia Relevante: Semana ne’e, Governu Sei Monta Kuadru Avizu Rezervatóriu iha Tohu-Meta

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here