Tanke Bee-Moos Tohu-Meta, iha Suku Tohu-Meta, Postu Administrativu Laulara, Munisípiu Aileu. Imajen Espesiál.

DILI, 21 maiu 2020 (TATOLI)–Governu liuhosi Servisu Água no Saneamentu (SAS) sei monta kuadru avizu iha Tanke Bee-Moos Tohu-Meta, iha Suku Tohu-Meta, Postu Administrativu Laulara, Munisípiu Aileu, tanba populasaun sira utiliza fali bee-ulun Tohu-Meta hanesan rezervatóriu hodi fornese bee-moos ba populasaun sira iha Kapitál Dili, hodi halo fali ba fatin turístiku.

Xefe Departamentu Abastesimentu Água Munisípiu Dili, Francisco Xavier Pereira, hateten Governu liuhosi Servisu Água no Saneamentu (SAS) koordena ona atu monta kuadru ida iha fatin refere hodi komunidade sira komprende katak fatin ne’e la’ós pixina hodi haris maibé rezervatóriu bee ne’ebé distribui bee ba komunidade sira hodi uza ba nesesidade loron-loron nian.

Imajen Espesiál.

“Ita hakarak dehan katak fatin ne’e la’ós paseiu (piknik), la’ós pixina no la’ós lixu fatin maibé fatin ne’e kaptasaun bee hosi rezervatóriu jerál hodi distribuisaun bee ba komunidade sira hodi uza,” dehan Xefe Departamentu Abastecimentu Água Munisípiu Dili, Francisco Xavier Pereira, ba Ajénsia TATOLI kona-ba preukupasaun hosi komunidade sira kona-ba fatin refere, via telefonika, kinta ne’e.

Xefe Abastesimentu ne’e hateten, iha semana ne’e SAS bele monta ona kuadru avizu ida iha dirasaun Munisípiu Aileu nian no ida seluk tau iha tanke bee-nian tanba kuadru ne’e prodús ona.

“Ohin, ita prodús ona kuadru avizu ne’e no hein aban ka bainrua ita bele monta ona iha fatin refere,” nia relata.

Tuir nia, parte SAS mós halo koordenasaun ho autoridade lokál sira hodi halo seguransa mós ba fatin nune’e ema labele tama ba laran.

“Momentu ami ba halo monitorizasaun ba rezervatóriu bee Tohu Meta nian mak depois liu loron tolu mak populasaun sira ba haris fali iha fatin ne’ebá. Tanba iha fatin ne’ebá ne’e, ami halo hanesan pixina haris nian entaun komunidade sira bolu malu ba haris iha laran. Maibé ami-nia parte halo ona relatóriu ba Diretór Jerál SAS hodi bele asegura no proteje rezervatóriu ho lalais,” dehan Francisco Xavier Pereira.

Iha momentu ne’e kedas, nia hateten, operadór tékniku SAS nian ba Tohu Meta, hato’o ona ba Xefe Aldeia no Xefe Suku iha área ne’ebá nian.

Tanke bee-moos ne’e, nia informa, hori tempu okupasaun Indonézia nian bandu tanba hanesan área protezidu tanba fornese bee-moos ba komunidade. Governu sei koordena ho autoridade Munisípiu Aileu nian hodi monta seguransa ka Konsellu Polísiamentu Komunitária (KPK) iha fatin refere.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here