Aviaun TRI-M.G. Imajen/Espesiál

DILI, 26 maiu 2020 (TATOLI) – Aviaun Charter TRI-M.G husi Singapura sei atera tuku 14:40 iha Aeroportu Internasionál Prezidente Nicolau Lobato, Comoro, sei transporta materiál doasaun ekipamentu médiku husi Jack Ma no Alibaba Foundation ba Timor-Leste.

Doasaun husi fundasaun rua ne’e hodi hatudu nafatin kooperasaun entre Governu Repúblika Xina no Timor-Leste ba luta kontra surtu COVID-19.

Materiál ne’ebé sei to’o mai maka hanesan máskara hamutuk 130.00, luvas medisina 20.000, ekipamentu protesaun pesoál 5.000, protesaun ba oin hamutuk 5.010, detections kits 5.088, reajente purifikasaun 5.040, reajente konservasaun amostra 5.000, termómetru 39 no ventuladór hamutuk 10.

Prezidente Autoridade Aviasaun Sivíl Timor-Leste (AACTL, sigla portugés), Ana Rosalia Ximenes Varela, informa aviaun ne’ebé maka transporta ekipamentu médiku ba COVID-19 husi Xina mai Timor-Leste agora daudaun iha ona dalan.

“Aviaun ne’ebé maka lori sasán protesaun COVID-19 nian husi Xina mai Timor-Leste ne’e ami konfirma ona katak nia sei tun iha  Aeroportu Internasionál tuku rua liu lorokraik ne’e”, dehan Ana Rosália ba Agênsia Tatoli via telefónika, tersa ne’e.

Notísia Relevante: Governu Timor-Leste Simu Doasaun Kombate COVID-19 Husi Governu Xina

Nia dehan, aviaun ne’e la tula pasajeiru, maibé sei tula de’it ekipamentu médiku.

“Aviaun ne’e sei la tula materiál seluk, tantu mós pasajeiru, maibé só tula de’it maka materiál COVID-19 nian”, nia akresenta.

Tuir informasaun husi Embaixada Xina iha Timor-Leste, sasán doasaun ne’e sei entrega simbolikamente iha Sala VIP Aeroportu Comoro, tuku 17:00 ohin lorokraik, husi Embaixada Xina ba Governu Timor-Leste liuhosi Ministériu Negósiu Estranjeiru no Kooperasaun (MNEK).

Kustu ba charter aviaun atu transporta ekipamentu médiku ne’e sei toma konta husi Governu Repúblika Populár Xina.

Antes ne’e, iha loron 28 abríl, Governu Repúblika Populár Xina apoiu materiál ba Governu Timor-Leste hanesan máskara 42.000, máskara KN95 40.000, aventál ba protesaun 4.400, vizeira 4.440, kapa ba sapatu 4.400, luvas ba médiku sira 5.000, termometru 80 no ventiladór portable 90.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here