Prezidente PN, Aniceto Longuinhos Guterres Lopez. Imajen Tatoli/Egas Cristovão

DILI, 26 marsu 2020 (TATOLI)—Pedidu destituisaun no eleisaun ba Sekretáriu no Vise-Sekretáriu Meza Parlamentu Nasionál adia ba próxima semana tanba Prezidente Parlamentu Nasionál, Aniceto Longuinhos Guterres Lopez, seidauk simu rekerimentu hosi bankada parlamentár sira.

Prezidente Parlamentu Nasionál, Aniceto Guterres, fó-sai katak to’o horisehik lorokraik seidauk simu rekerimentu ba destituisaun no eleisaun ba kargu sekretária no vise-sekretária sira.

Ho nune’e, Vise-Xefe Bankada FRETILIN, Deputadu Francisco Miranda Branco, esplika loloos ne’e ohin realiza pedidu destituisaun no eleisaun ba sekretáriu no vise-sekretáriu maibé mosu lapsu iha naran kandidadu sira.

“Tuir loloos, ohin, ita avansa ona ba destituisaun ba sekretáriu no vise-sekretáriu meza Parlamentu Nasionál maibé tanba iha lapsu uitoan ba kandidatu sira-nia naran entaun ami foin kompleta no foin hatama iha dadeersan ne’e, karik bele iha plenária estraordinária ida hodi haree asuntu ne’e,” Vise-Xefe Bankada FRETILIN, Deputadu Francisco Miranda Branco, informa liuhosi plenária, tersa ne’e.

Iha fatin hanesan, Vise-Xefe Bankada KHUNTO, Deputada Olinda Guterres, rekoñese iha lapsu kona-ba kandidatu sira-nia naran.

“Horisehik atu hatama duni naran maibé la konsege, horisehik lokraik ha’u ba konsulta ho Konselleiru Máximu KHUNTO, Naimori no konselleiru hatudu ami na’in-haat ne’e ida mak atu ba asume kargu iha vise-sekretária meza,” Deputada Olinda Guterres haktuir.

Relasiona ho asuntu ne’ebé akresenta hosi bankada FRETILIN no KHUNTO, Prezidente Parlamentu Naisonál, Aniceto Guterres, fixa de’it ajenda ida de’it ba loron ohin.

“Ita konkorda no aprova ajenda período da ordem do dia iha de’it ajenda ida de’it ba aprezentasaun relatóriu anuál Komisaun Antí Korrupsaun (KAK) nian, ajenda destituisaun no eleisaun ba sekretáriu no vise-sekretáriu ita hasai, ita adia ba próxima sesaun plenária, bele sesaun estraordinária ou sesaun plenária normal,”   Deputadu Aniceto Guterres, anunsia liuhosi plenária.

Prezidente Parlamentu Nasionál labele pronunsia lai kandidatu sira-nia naran, maibé sei pronúnsia molok tama ba eleisaun.

Sekretária Meza Parlamentu Nasionál Sesante, Deputada Maria Terezinha Viegas hosi bankada CNRT no Vise-Sekretária Meza Parlamentu Nasionál Sesante, Deputada Isabel Maria Barreto Freitas Ximenes hosi Bankada UDT/FM. Purtantu Segundu Vise-Sekretária, Regina Freitas hosi PLP (posibilidade mantein).

Tuir Rejimentu Parlamentu Nasionál (RPN) artigu 19 (Eleisaun ba Vise-Prezidente, Sekretáriu no Vise-Sekretáriu), alínea 1 hanesan vise-prezidente sira, sekretáriu no vise-sekretáriu sira-ne’e eleitu ba lejizlatura ida.

Alínea 2 artigu ne’e subliña, hosi kandidatura ba kargu vise-prezidente, sekretáriu no vise-sekretáriu Parlamentu Nasionál tenke subskreve husi mínimu deputadu na’in-ualu no máximo na’in sanulu-resin-rua, no aprezenta liuhusi lista fechada, kompleta no nominativa.

Alínea 3 hosi artigu ne’e hateten kandidatura ba kargu previstu iha númeru anteriór tenke aprezenta ba Prezidente Parlamentu to’o 24 horas molok data ne’ebé marka ba eleisaun.

Alínea 4 hosi artigu ne’e esplika, eleisaun sei hala’o tuir eskrutíniu sekretu, no sei buka atu asegura katak kompozisaun lista konkorrente ida-idak, konforme posível, iha partisipasaun proporsionál husi bankada parlamentár ne’ebé iha reprezentasaun iha parlamentu.

Nune’e alínea 5 hosi artigu ne’e akresensta, kandidatu sira sai eleitu bainhira sira hola parte iha lista ne’ebé hetan maioria absoluta husi votu Deputadu eleitu sira-nian.

Alínea 6 hosi artigu 19 ne’e dehan, remata tiha reuniaun, Prezidente Parlamentu sei komunika kompozisaun meza nian ba Prezidente Repúblika no ba Primeiru-Ministru.

Notísia Relevante: Aniceto Guterres Deside Adia Eleisaun Ba Sekretáriu no Vise-Sekretáriu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here