Primeiru-Ministru, Taur Matan Ruak prezide reuniaun Konsellu Ministru estraordinária iha Palásiu Governu, segunda (25/05). Imajen Tatoli/Egas Cristovão

DILI, 25 maiu 2020 (TATOLI) – Iha reuniaun Konsellu Ministru (KM) estraordinária segunda ne’e, Membru Governu sira rona aprezentasaun husi Ministru Obra Públika, Salvador Eugênio Soares dos Reis Pires hamutuk ho Sekretáriu Estadu Protesaun Sivíl, Alexandrino de Araújo, kona-ba estragu no vítima afetadu durante udan-boot to’o provoka inundasaun iha munisípiu, ne’ebé akontese iha loron 21 no 22 maiu.

“Ministériu Obra Públika (MOP) hamutuk ho Sekretaria Estadu Protesaun Sivíl (SEPS) aprezenta ba Konsellu Ministru kona-ba situasaun no intervensaun medida sira ne’ebé maka Governu bele foti, ba hirak ne’ebé mak afetadu inundasaun tanba udan-boot foin lalais”, relata Ministru Reforma Lejizlativa no Asuntu Parlamentár, Fidelis Manuel Leite Magalhães liuhosi konferénsia imprensa iha Palásiu Governu hafoin reuniaun ezekutivu.

Notísia Relevante: Pontu Fokál SEPS Sei Rekolla Dadus Vítima Dezastre Naturál iha Munisípiu

Tuir governante ne’e, MOP halo aprezentasaun kona-ba estragu sira ne’ebé maka akontese no SEPS haree ba parte sidadaun sira ne’ebé sai vítima ba inundasaun.

Dezastre naturál durante loron-rua akontese iha munisípiu sira hanesan Covalima, Manatuto, Manufahi, Viqueque, Lautém no Baucau.

Inundasaun ne’ebé akontese halo estrada, ponte, no ai-rin eletrisidade sira a’at inklui komunidade sira nia uma mós afetadu.

Biban hanesan, Ministru Administrasaun Estatál interinu, Abílio José Caetano, aprezenta mós informasaun ne’ebé simu hosi administrasaun lokál sira relasiona ho dezastre naturál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here