Sekretáriu Estadu Protesaun Sivíl, Alexandrino de Araújo. Imajen Tatoli/Egas Cristóvão

DILI, 22 maiu 2020 (TATOLI) – Udan boot iha loron-rua husi 21 to’o 22 maiu iha parte Kosta Súl, rezulta inundasaun iha Munisípiu Covalima, Manufahi, Manatuto, Viqueque inklui Lautém, tanba ne’e ekipa husi Sekretaria Estadu Protesaun Sivíl (SEPS) sei rekolla dadus vítima dezastre iha munisípiu hodi fó apoiu emerjénsia.

Sekretáriu Estadu Protesaun Sivíl, Alexandrino de Araújo, fó ona orientasaun ba pontu fokál SEPS hodi desloka ba munisípiu sira ne’ebé daudaun ne’e hasoru dezastre naturál.

“Ha’u simu hotu ona informasaun hosi munisípiu sira ne’ebé daudaun hasoru dezastre naturál no ha’u mós fó ona orientasaun ba Diretór Jerál no Diretór Nasionál Dezastre Naturál atu kontaktu ho pontu fokál munisípiu. Ekipa sira ne’e ami kontaktu hotu ona no hein de’it dadus tama hodi fó apoia emerjénsia”, relata Alexandrino de Araújo iha Salaun Ministériu Finansa, Aitarak-Laran, sesta ne’e.

Governante ne’e hatutan, informasaun ne’ebé nia simu inklui ho imajen sira hosi fatin akontesementu hanesan iha Munisípiu Covalima, Lautém, Viquque no Baucau.

“Ha’u simu ona informasaun no imajen inundasaun, maibé agora daudaun ne’e ami nia pontu fokál sei rekolla hela dadus komunidade hira maka afetadu, tanba ne’e agora pontu fokál sira iha hela terenu. Ha’u simu informasaun katak udan halo rai monu hodi taka uma komunidade nian”, nia informa.

Nia konsidera, dezastre ne’e nunka la espera bainhira de’it bele akontese, maski nune’e ekipa bombeiru iha ona terrenu hodi normaliza fatin sira ne’ebé mosu dezastre naturál maibé ekipa bombeiru hasoru difikuldade iha ekipamentu.

“Ami nia difikuldade mak ekipamentu ba ekipa bombeiru sira hodi atende dezastre naturál ne’ebé maka limitadu tebes, instituisaun protesaun sivíl ne’e mós foun tanba foin mak harii. Tanba ne’e ha’u esforsu ona atu hadi’ak no prepara di’ak liután rekursu inklui ekipamentu hodi atende komunidade iha tempu inundasaun”, nia akresenta.

Aleinde limitadu iha ekipamentu, daudaun ne’e protesaun sivíl mós limitadu iha rekursu umanu.

Antes ne’e, iha loron 13 marsu udan boot no rezulta inundasaun iha fatin-fatin iha kapitál Dili, ne’ebé tuir dadus husi SEPS rasik, família hamutuk 4.286 maka afatadu ba dizastre naturál ne’e.

Ba kestaun ne’e, Konsellu Administrasaun Fundu Infraestutura (KAFI) aprova ona millaun $15 ba kustu estimasaun estragu inundasaun, hanesan estragu ponte no estrada sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here