Prezidente Partidu CNRT, Kay Rala Xanana Gusmão, llidera konferénsia imprensa iha Sede Nasionál Partidu CNRT iha Bairru Grilos, Dili, sábadu (23/05/2020). Imajen/Eugénio Pereira

DILI, 23 maiu 2020 (TATOLI) – Komisaun Polítika Nasionál Partidu Congresso Naçional de Recontrução de Timor-Leste (CPN-CNRT) fó loron ikus, 25 maiu 2020, ba membru Governu ne’ebé indizita husi partidu CNRT atu sai husi estrutura Governu da-ualu ne’ebé lidera husi Primeiru-Ministru, Taur Matan Ruak.

Notísia Relevante : CNRT Deklara Retira Hosi VIII Governu

Desizaun ne’e CPN-CNRT deklara, hafoin hala’o reuniaun aberta iha loron 22 maiu 2020, hodi aprova mós pontu importante haat (4) mak hanesan; 1) husu ba Membru Governu indizitadu husi partidu CNRT, hahú husi loron 25 maiu 2020 retira ka sai husi mandatu Governu Konstitusionál da-ualu.

2). Husu ba membru Parlamentu Nasionál husi Bankada CNRT sei mantein pozisaun atu la tuir atividade sira ne’ebé konvoka husi Prezidente Parlamentu Nasional (PPN) foun, Aniceto Longuinhos Guterres, iha uma fukun Parlamentu Nasionál hodi hein rezultadu investigasaun ne’ebé tenke rezolve tuir lei ne’ebé vigor iha Timor-Leste.

3). Bendito dos Santos Freitas, eis Sekretáriu Estadu Polítika Formasaun Profisionál no Empregu (SEPFOPE) sei relata pozisaun partidu husi alegasaun ne’ebé fundamentál.

4). Pontu situasaun atuál husi Partidu CNRT kontinua akompaña situasaun polítika iha rai-laran.

Prezidente Partidu CNRT, Kay Rala Xanana Gusmão. Imajen/Eugénio Pereira

“Membru Governu CNRT sira fó tempu too loron 25 maiu 2020, sira sei sai hotu hodi prepara ba sira nia kontra responsabilidade hodi la pertense ona ba governu da-ualu,” afirma Prezidente Partidu CNRT, Kay Rala Xanana Gusmão, liuhusi konferénsia imprensa iha Sede Nasionál Partidu CNRT iha Bairru Grilos, Dili, sábadu  (23/05/2020).

Partidu CNRT mós haruka ona karta ba kuadru membru governu CNRT nian hodi kumpre regra ne’ebé partidu fó sai tiha ona iha loron 30 abríl 2020.

Kuadru CNRT ne’ebé envolve iha VIII Governu Konstitusionál mak hanesan Ministru Estadu Prezidénsia Konsellu Ministru, Hermenegildo Augusto Cabral Pereira, Ministru Negósiu Estranjeiru no Kooperasaun, Dionísio da Costa Babo Soares, Ministra Edukasaun Ensinu Baziku, Juventude no Desportu, Dulce de Jesus Soares, Vise-Ministra Finansa, Sara Lobo Brites, Vise-Ministru Administrasaun Estatál, Abílio José Caetano, Sekretáriu Estadu Kooperativa, Arsénio Pereira da Silva, Sekretáriu Estadu Juventude no Desportu, Nélio Isaac Sarmento, Sekretáriu Estadu Arte no Kultura, Teófilo Caldas, Sekretáriu Estadu Asuntu Kombatente Libertasaun Nasionál, Gil da Costa Monteiro “Oan Soru” (independente maibé indizita mós husi CNRT).

Kuadru ida husi CNRT ne’ebé envolve iha VIII Governu okupa kargu Vise-Ministra Kuidadu Saúde Primáriu, Élia  António de Araújo dos Reis Amaral, maibé ezonera ona.

Iha parte seluk, Xanana Gusmão mós husu ba militante partidu CNRT sira atu kontinua kontribui ba pás hodi tuur hakmatek hodi kontribui mós ba estadu de direitu demokrátiku.

Partidu CNRT mós sei halo konferénsia ida hodi hato’o  mensajen no desizaun polítika partidu CNRT nian ba membru tomak hodi koopera no komprende ba desizaun ne’e.

“Husu ba militante sira atu hakmatek hodi kumpre ba regra,” apela Kay Rala Xanana Gusmão.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here