Prezidente Konsellu Jestaun Fundu COVID-19 no atuál Ministra Finansa ein ezersísiu, Sara Lobo Brites, prezide reuniaun Komisaun Interministeriál Kona-ba Fundu COVID-19, iha Salaun Ministériu Finansa, Aitarak-Laran, segunda (25/05). Imajen Tatoli/Egas Cristovão

DILI, 25 maiu 2020 (TATOLI) – Governu liuhosi Konsellu Jestaun Fundu COVID-19 aloka ona orsamentu hamutuk millaun $63,6 hodi fó subsídiu ba uma-kain iha Timor-Leste hamutuk 318.302.

Koordenadór Sekretariadu Konsellu Jestaun Fundu COVID-19, Januário da Gama, hateten orsamentu ne’ebé aloka hodi fó subsídiu ba uma-kain sira antes ne’e hamutuk millaun $15, maibé haree fali ba totál uma-kain orsamentu ne’e la to’o, tanba ne’e ho orientasaun husi Primeiru-Ministru, Taur Matan Ruak nian ba ekipa Konsellu Jestaun Fundu katak presiza halo alterasaun fali ba instituisaun no ministériu sira seluk hodi foti fali orsamentu ne’ebé la nesesáriu atu implementa”, informa Januário da Gama liuhosi konferénsia imprensa hafoin reuniaun Konsellu Jestaun Fundu  COVID-19 iha Salaun Ministériu Finansa (MF), Aitarak-Laran, segunda ne’e.

Diretór Jerál Orsamentu Estadu Ministériu Finansa (MF), Januário da Gama. Imajen/ Tatoli Egas Cristovão.

Tuir Koordenadór ne’e, Konsellu Jestaun iha  reuniaun ne’e diskute asuntu prinsipál maka halo alterasaun orsamentu iha Fundu COVID-19, liuliu despeza sira ne’ebé ba ministériu no instituisaun implementadór sira halo alterasaun ka halo re-alokasaun fali ba subsídiu uma-kain ninian, ne’ebé Governu kompromete ona atu halo pagamentu iha tempu badak.

Notísia Relevante: Governu Aprova Subsídiu ba Família ho Rendimentu Ki’ik Durante Períodu EE

“Totál orsamentu ba subsídiu uma-kain orijinalmente aloka millaun $15, maibé hafoin dadus aprezenta hosi Ministériu Solidariedade Sosiál no Inkluzaun (MSSI) mai iha Konsellu Jestaun, uma-kain iha Timor-Leste hamutuk 318.302. Signifika presiza orsamentu ba fulan-rua pur volta millaun $63,6”, nia adianta.

Alokasaun orijinál orsamentu ne’e sei iha défisi pur volta millaun $48.

“Husi défisi ne’e maka ohin Konsellu Jestaun aprova ona alterasaun orsamentu husi fundu no hetan ona ninia kabimentu orsamentu”, nia akresenta.

Sei Halo Alterasaun ba Sistema

Sekretariadu Tékniku iha MF sei halo alterasaun iha sistema hahú aban no bain-rua (tersa no kuarta), nune’e bele konklui, hafoin loron rua-ne’e MSSI bele aprezenta pedidu detallu hamutuk ho konta bankária ministériu nian mai MF liuhusi Sekretariadu Tékniku no bele halo transferénsia orsamentu ba konta bankária.

Atuál Diretór Jerál Orsamentu Estadu MF ne’e subliña, bazeia ba instrusaun husi reuniaun Komisaun Interministeriál iha sesta semana kotuk, Xefe Governu husu atu halo identifikasaun ba atividade, programa no despeza sira ne’ebé ladún iha nesesidade atu ezekuta imediata iha tempu badak.

“Pur tantu despeza sira ne’e maka ami identifika hodi re-aloka filafali mai despeza uma-kain. Ezemplu despeza ne’ebé aloka ba iha FALINTIL-Forsa Defeza Timor-Leste (F-FDTL) orijinalmente millaun $6, maibé alokasaun ne’e liu kalkulasaun ikus ne’ebé halo, entaun balansu ne’ebé mak iha re-aloka fali mai iha subsídiu uma-kain, hanesan mós ba Polísia Nasionál Timor-Leste (PNTL) alokasaun originál millaun $6, entaun halo alterasaun mós iha F-FDTL nian tanba sira sosa ekipamentu ba COVID-19 la nesesita sosa iha F-FDTL maibé karik sira iha nesesidade bele husu pedidu ba Ministériu Saúde hodi bele hatan”, nia esplika.

Tuir Koordenadór ne’e, alterasaun sira ne’ebé maka halo sei la fó implikasaun todan ba atividade no programa iha nível ministériu no instituisaun sira ne’ebé hetan ona alokasaun orsamentu.

Antes ne’e, iha loron 23 abríl, Governu liuhosi reuniaun Konsellu Ministru estraordinária, aprova proposta ne’ebé aprezenta husi Ministra Solidaridade Sosiál no Inkluzaun, Armanda Berta dos Santos kona-ba apoiu monetáriu ba agregadu familiár sira durante períodu Estadu Emerjénsia ligadu ho surtu COVID-19 iha Timor-Leste.

Ema sira maka sei sai nu’udar benefisiáriu maka agregadu familiár sira ne’ebé kompostu husi pelumenuz sidadaun ida, ne‘ebé rejista ona to’o loron 31 marsu 2020 iha Livru Rejistu ‘Uma Kain’ no iha família ne’e nia laran, nia elementu ida kada fulan no simu osan la boot liu husi $500.

Apoiu ne’e hamutuk $100 kada fulan ba agregadu familiár no pagamentu sei halo iha fulan-maiu nia-laran, hafoin aprova diploma ida-ne’e no kustu hotu sei finansia husi Fundu COVID-19.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here