Primeiru-Ministru, Taur Matan Ruak prezide reuniaun Konsellu Ministru, kinta (23/04) iha Salaun Ministériu Finansa, Aitarak-Laran. Imajen Tatoli/António Gonçalves

DILI, 23 abríl 2020 (TATOLI) – Governu liuhosi reuniaun Konsellu Ministru (KM) estraordinária kinta ne’e, aprova proposta ne’ebé aprezenta husi Ministra Solidaridade Sosiál no Inkluzaun, Armanda Berta dos Santos kona-ba apoiu monetáriu ba agregadu familiár sira durante períodu Estadu Emerjénsia (EE) ligadu ho surtu COVID-19 iha Timor-Leste.

Ema sira maka sei sai nu’udar benefisiáriu maka agregadu familiár sira ne’ebé kompostu hosi pelumenuz sidadaun ida, ne‘ebé rejista ona to’o loron 31 marsu 2020 iha Livru Rejistu ‘Uma Kain’ no iha família ne’e nia-laran, nia elementu ida kada fulan simu osan la boot liu husi $500.

Notísia Relevante: Subsídiu ba Uma-Kain $100 Durante Estadu Emerjénsia Foin Iha Faze Diskusaun

“Apoiu ne’e sei ho osan $100 kada fulan ba agregadu familiár. Pagamentu sei halo hahú husi fulan tuirmai (maiu) hafoin aprova tiha diploma ida-ne’e no kustu hotu sei finansia husi Fundu COVID-19”, haktuir nota ofisiál husi Governu ne’ebé Agência Tatoli asesu, hafoin reuniaun Konsellu Ministru estraordinária ne’ebé realiza iha edifísiu Ministériu Finansa, Aitarak-Laran, iha kinta ne’e

Medida ida-ne’e nu’udar intervensaun Governu ba tempu badak, hodi enfrenta impaktu prejudisiál liuhosi meiu subsisténsia ba família ne’ebé nia rendimentu ki’ik iha teritóriu Iaran tomak.

Apoiu ida-ne’e ho karatér apoiu diretu ba sidadaun sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here