Happy Eid. Imajen Foti husi Google

DILI, 24 maiu 2020 (TATOLI) –“Allahu Akbar, Allahu Akbar, Allahu Akbar, Laa-Illaha wa allahu Akbar, Allahu Akbar…” Lia-kmo’ok ne’e sai husi altofalante Meskita AN-NUR nian iha Kampu Alor, Dili, hodi fanun musulmanu sira  iha rai nakaras nia-laran, tuku 05:00 dadeer,  hodi hato’o agradese no hawelok ba Nai Maromak hodi selebra loron boot Idul Fitri,  1 Syawal 1441 Hijriyah.

Notísia Relevante : Musulmanu Timor-Leste Hahú Adorasaun Ramadhan

Mezmu selebrasaun loron boot Idul Fitri, tinan-ne’e,  diferente ho tinan sira liu-ba, tanba tenke selebra iha situasaun ameasa propagasaun surtu Coronavirus ka COVID-19 no Estadu Emerjénsia, maibé Musulmanu sira ho ksolok halibur malu iha ida-idak nia hela-fatin hodi halo orasaun no hato’o agradesimentu ua’in ba Maromak ba sira-nia loron moris foun ida-ne’e.

Prezidente Musulmanu Timor-Leste, Arif Abdullah Sagran.

Liuhusi mensajen WhatsApp, Prezidente Musulmanu Timor-Leste, Arif Abullah Sagran, domingu (24/05/2020),  fó sasin katak,  loron Idul Fitri hanesan loron vitória hafoin fulan tomak  ida ba kotuk ka fulan Ramadhan, musulmanu sira halo  sakrifisiu ho jejún hodi hadook-aan husi sala no hakribi sala sira.

“Tinan ida-ne’e, ho propagasaun surtu  coronavirus ka COVID-19, musulmanu sira la ba halibur malu iha Meskita iha loron Idul Fitri 1441 Hijriyah, maibé sira hakmatek de’it iha sira uma ida-idak hodi hasa’e orasaun agradesimentu,” hateten Arif Abdullah Sagran.

Nia hateten, ho fulan Ramadhan no Idul Fitri bele fó espíritu foun ba musulmanu sira bele di’ak liu tan ba loron oin nian mai tanba objetivu Ramadhan ida-nee mak Taqwa.

Taqwa hanesan hakbesik-aan liu tan ba Maromak ka Allah liuhusi dalan hadook-aan husi buat sira mak Maromak bandu no hala’o buat sira mak Maromak  haruka ba nia emar-sira.

“Ami mós agradese tebes tanba durante fulan Ramadan ne’e bele halo atividade  ho di’ak, mezmu iha tempu Estadu Emerjénsia  no propagasaun COVID-19 nia laran. Lahaluha hato’o ami musulmanu nia obrigadu ba sarani sira iha Timor laran mak fó sira nia toleránsia boot tebes durante ne’e,” hateten Arif Sagran.

“Ba musulmanu sira iha Timor laran tomak, hau hato’o Minal Aidzin Wal Faidzin, Eid Mubarak,” Arif Sagran tenik tan.

Jornalista        : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here