Grupu voluntariu hosi Movimentu Tasi Mos rega hela disinfection iha Meskita An-nur, Kampu Alor, hodi prevene propagasaun surtu COVID-19. Imajen/Antonio Gonçalves

DILI, 24 abríl 2020 (TATOLI) – Musulmanu iha mundu rai-klaran, inklui iha Timor-Leste, ohin, hahú ona adorasaun Ramadhan hodi halo jejún durante loron-30 nia laran bá-oin.

Mezmu adorasaun Ramadhan, tinan ne’e, nakonu ho dezafiu tanba propagasaun surtu Coronavirus ka COVID-19 no tenke obdese ba regra situasaun estadu emerjénsia, maibé  musulmanu iha territóriu nasionál esforsu no animadu nafatin hodi hala’o jejún Ramadhan no halo sakrifísiu.

Prezidente Musulmanu Timor-Leste, Arif Abdullah Sagran.

Prezidente Musulmanu Timor-Leste, Arif Abdullah Sagran,  apela ba musulmanu hotu iha territóriu nasionál atu hala’o atividade Ramadhan hanesan sholat tarawih no tadarus Quran iha uma de’it, hodi evita propagasaun peste letál Coronavirus ka COVID-19.

Ho situasaun estadu emerjénsia, musulmanu Timor-Leste mós la hala’o atividade aberta ka atividade konsentradu iha meskita laran no li’ur. Maski nune’e, musulmanu hotu halo adjan dala-lima loron-loron.

“Ami agradese no apresia tebes ho sentida toleránsia ne’ebé boot tebes hosi sarani katólika. Ho Ramadhan loron-30 bá-oin, espera katak Ramadhan ne’e ita hala’o ho fé bele haforsa ita-neon no fuan no bele hasa’e ita-nia ion ka enérjia iha ita-nia isin hodi halakon moras COVID-19,” hateten Arif Abdullah Sagran, hodi responde Agência Tatoli, ohin, liuhosi komunikasaun mensajen WhatsApp.

Arif Abdullah Sagran esplika katak, ba musulmanu, jejún hanesan alimentár ida ba hetan grasa klamar nian (TAQWA ) no Ramadan hanesan mós fulan ba sia (9) hosi fulan 12  iha Tinan Hijiriyah  ka  tinan ida-ne’e hanesan tinan 1441 Hijiriyah.

Ramadhan, tuir Arif Sagran,  hanesan fulan ida importante tebes iha Tinan Hijiriyah ne’e, katak, fulan ida Nai Maromak fó biban boot tebes ba nia emar-sira para bele hakbesik ba Nia, husu tulun ba Nia no husu perdaun ba Nia.

“Ita tenke tau ita-nia fuan metin no mós hatudu ita-nia sentida solidariedade  ba malu. Iha Ramadhan ne’e mós iha kalan ida mak Nai Maromak fó ba ita kalan di’ak liu  fulan 1000 (kalan Lailatul Qadar) musulmanu sempre aproveita kalan ida-ne’e (tanba ita la hatene iha sá-loron loos tanba nee tenke aproveita iha fulan ida tomak),” esplika Arif Abdullah Sagran.

Nia lia-tun tan dehan, Ramadhan hanesan mós treinamentu ba musulmanu sira ne’ebé iha kbiit saúde hodi  obrigatóriu kumpre jejún ida-ne’e.

Jejúm ka dalen indonézia  dehan puasa no iha dalen Arabia dehan, siyam signifika katak halulik-an  ka satan-an “menahan diri” hosi buat sira ne’ebé mak bele sobu musulmanu sira-nia sakrifisiu ba Nai Maromak Allah Taala.

Durante hala’o adorasaun Ramadhan, musulmanu sira mós iha obrigasaun atu sakrifika-an  ka satan-an atu la han no hemu saida de’it hosi tuku 05.24 madrugada (Subuh)  to’o tuku 18.34 Otl (Magrib).

Arif Sagran esplika katak, sakrifika-an ne’e inklui mós labele halo relasaun seksuál ba kaben-na’in sira durante oras refere (ba sira sidauk kaben-na’in nee bandu liu-tan) no iha kalan hala’o Sholat Tarawih bele iha uma rasik ka iha meskita.

Sakrifika ne’e, tuir Arif Sagran, atu hatudu solidaridade sosiál selu taxa (zakat mal ho zakat Fitra) %2,5 hosi total nia riku-soin ne’ebé dura ona tinan-ida no liu ona totál osan-mean grama 92 no igualmente (zakat mal) ba sira ne’ebé la iha kbiit ekonomia no zakat Fitra ekivalente  fó kg2.75 obrigatóriu iha fulan Ramadhan ne’e.

Sakrifísiu seluk no importante mós hateten Arif Sagran, atu habarak rituál relijiaun hanesan lee Quran, sholat Sunnah no perdua-malu, ho objetivu finál mak iha musulmanu  bolu TAQWA.

TAQWA lian Arabia ka ho dalen Tétun karik dehan hakbesik-an ba Maromak atu bele hetan TAQWA. Tanba ne’e, Arif Sagran hateten, musulmanu sira  tenke kumpre rituál adorasaun Ramadhan nian.

Ikusliu iha adorasaun Ramadhan jejún durante loron-30 maka musulmanu sira tama ba selebrasaun  IDUL FITRI (kembali suci) ne’ebé iha musulmanu sira bele ba halibur iha meskita  no mós iha sira-nia uma halo TAKBIRAN hanesan Takbir Allah Akbar, Tahmid Subhana Allah, Tahlil La Ilaha Illa Allah.

“Loron Idul Fitri, ami hotu haksolok no selebra loron ne’ebé bele dehan ami hotu manán hosi ezame boot-ida durante halo sakrifísiu iha loron-30 nia laran ba kotuk,” Arif Abdullah Sagran hateten.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here