MOP no Empreza CBMI normaliza ona ponte veru-koco Lautem. Imajen/FB

DILI, 23 maiu 2020 (TATOLI) – Ministériu Obra Públika (MOP) liuhosi Diresaun Jerál Obra Públika no Unidade Jestaun Projetu (PMU, sigla inglés) orienta ona kompañia CBMI hodi halo provizóriu normalizasaun Ponte Veru-koco ne’ebé kotu iha Postu Administrativu Lautém, Munisípiu Lautém.

Kompañia CBMI daudaun ne’e kaer hela obra estrada dirasaun Baucau-Viqueque.

Ponte Weru-Koco lokaliza iha Suku Baduru, Postu Administrativu Lautém, besik Monumentu Apikuru (Monumentu Masakre 25 Setembru 1999).

“Servisu normalizasaun ne’e hala’o desde horikalan tomak no ohin kontinua halo servisu hodi kontinua garante movimentasaun iha ponte ne’e,” refere nota imprensa ne’ebé Agência Tatoli asesu, sábadu ne’e.

Notísia Relevante: MOP-PMU Orienta Ona Empreza CBMI Hadi’a Ponte Weru-Koco Lautém

Ponte Weru-koco liga ba Postu Administrativu Lospalos Vila, tanba ne’e liuhosi normalizasaun ne’e bele ona fasilita movimentasaun komunidade inklui transporte públiku no privadu iha fatin refere.

Hafoin udan-boot to’o hamosu inundasaun iha loron 21 no 22 maiu iha Kosta Súl no parte Leste, Ministru Obras Públika, Salvador Eugênio Soares dos Reis Pires, orienta kedas Diresaun Jerál Obra Públika (DGOP) no Intitutu Jestaun Ekipamentu (IGE, sigla portugés) hodi halo atendimentu emerjénsia.

Tanba ne’e, ekipamentu pezadu IGE nian daudaun ne’e destaka ona iha Kosta Súl hodi halo atendimentu emerjénsia ba konektividade ba movimentasaun komunidade nian no transporte sira.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here