Ponte Weru-Koco, Lautém tohar kauza husi udan boot. Imajen/FB Jully Centro

DILI, 22 maiu 2020 (TATOLI) – Diretór Jerál Obra Públika, Rui Hernani, informa Unidade Jestaun Projetu (PMU, sigla inglés) orienta ona empreza kontratór xuneza, CBMI atu hadi’a ponte Weru-Koco ne’ebé liga estrada dirasaun Dili-Lospalos.

Ponte Weru-Koco iha sesta (22/5) madrugada, tohar tanba udan-boot ne’ebé akontese kuaze oras haat nia-laran.

Ponte ne’e lokaliza iha Suku Baduru, Postu Administrativu Lautém, besik Monumentu Apikuru (Monumentu Masakre 25 Setembru 1999).

“Ami orienta ona PMU hodi halo asaun nesesária no imediata hodi kompañia bele solusiona pontu situasaun ne’e tanba projetu sei iha prosesu ezekusaun hela husi kontratór CBMI no sub-konsultór Dongsun”, tenik Diretór Jerál ne’e ba Agência Tatoli, sesta ne’e.

Dirijente ne’e adianta, daudaun ne’e PMU ho empreza kontratór iha ona terrenu atu hadi’a ponte ne’e hodi bele fasilita movimentasaun transporte públiku no privadu husi dirasaun Dili ba Lospalos no Lospalos mai Dili.

“Ami ho kontratór buka ona solusaun, atu buka dalan alternativa hodi fasilita movimentu transporte hafoin reabilita ponte ne’e”, Rui Hernani akresenta.

Ho nune’e, nia iha esperansa empreza kontratór sei solusiona lalais atu bele fasilita movimentu husi Lautém mai Dili.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here