Vise-Konsellu Polítika Nasionál (CPN) CNRT, Virgílio Smith. Imajen Tatoli/ Egas Cristóvão

DILI, 11 maiu 2020 (TATOLI)—Partidu Congresso Nacional da Reconstrução de Timor (CNRT), deklara retira hosi VIII Governu Konstitusionál no deside kuadru partidu ne’ebé envolve iha Governu atuál atu rezigna-an.

Hafoin CNRT halo análize kle’an ba dezenvolvimentu polítiku iha rai-laran deside fó mandatu ba Prezidente Partidu, Kay Rala Xanana Gusmão, hodi haruka karta ba Primeiru-Ministru, Taur Matan Ruak, kona-ba rezolusaun tuirmai ne’e.

“Atu deklara publikamente katak CNRT nu’udar partidu retira-an hosi Governu atuál. Rekomenda ba hotu-hotu ne’ebé iha juñu 2018, partidu mak indijita hodi simu pose no hola-parte iha Governu atuál atu rezigna-an ho livre no vontade”, Adjuntu Sekretáriu Jerál Partidu CNRT, Jacinto Rigoberto de Deus, deklara liuhosi konferénsia imprensa, iha sede Partidu CNRT, Bairro dos Grilhos, Dili, segunda ne’e.

Partidu CNRT hakarak fó sai ba públiku katak iha loron 30 fulan abril, Komisaun Polítika Partidu CNRT realiza ninia reuniaun hodi buka tau hamutuk hanoin, atu responde ba situasaun ne’e.

Adjuntu Sekretáriu Jerál CNRT, Jacinto Rigoberto. Imajen/ Egas Cristóvão

Iha loron 8 maiu, sesta semana kotuk, Komisaun Polítika Nasionál partidu nian reúne, pela segundavez, atu aborda asuntu ida-ne’e duni no reafirma desizaun ne’ebé hasai tiha ona iha 30 abríl.

Entretantu, Vise-Prezidente Partidu CNRT, Virgílio Smith, haktuir akta reuniaun 30 abríl nian deside CNRT sai hosi Governu atuál.

“CNRT la halo parte ona iha VIII Governu. Hosi faktu ne’e, PLP ho KHUNTO de’it mak mantén hela iha Governu. Partidu rua ne’e, PLP ho KHUNTO, iha de’it deputadu sanulu resin-tolu, nebé la reprezenta maioria iha Parlamentu Nasionál”, nia esplika.

Nia hatutan, partidu istóriku FRETILIN sei fó apoia, tanba haruka ona lista partidu-nian ba membru Governo, tuir plataforma entendimentu ne’ebé asina ho PLP.

Nia esplika, Konstituisaun dehan, iha artigu 85º katak ‘Prezidente Repúblika nomea no fó pose ba Primeiru-Ministru, ne’ebé indijitadu hosi partidu ka hosi aliansa partidu ho maioria parlamentar’.

“Ne’e katak partidu FRETILIN tenke tama iha Koligasaun foun ho PLP no KHUNTO, tanba, CNRT sai tiha ona hosi VIII Governu. Purtantu, PLP ho KHUNTO, ho de’it deputadu 13, la reprezenta legalmente ‘maioria parlamentár”, Virgílio subliña.

Plataforma entendimentu bele funsiona hanesan ‘governu inkluzaun’, hanesan ida-ne’ebé CNRT halo iha 2015, maibé VI Governu rasik iha ninia ‘maioria parlamentár’, tanba bankada FRETILIN sai nafatin opozisaun iha VI Governu.

“Tan ne’e, labele uza ‘plataforma entendimentu’ hanesan dalan ida atu FRETILIN tama iha Governu husi odamatan kotuk, tanba Governu agora ne’e, legál no konstitusionalmente, lakon tiha ona ‘maioria parlamentár’, tanba Partidu CNRT sai tiha ona. Maibé, Governu foun ne’ebé mai ne’e la’ós ona VIII Governu, no konstitusionalmente tenki iha reprezentatividade legál iha Parlamentu Nasionál.

Nune’e, Partidu CNRT hein katak, iha tempu badak partiduu tolu kompostu hosi FRETILIN, PLP ho KHUNTO sei hala’o ida-idak nia konferénsia nasionál atu aprova tama iha koligasaun foun ida, ho definisaun klara kona-ba koligasaun ne’e nia ámbitu ho ninia finalidade tuir artigu 9º Lei Partidu Polítiku.

Tuir nia, partidu CNRT atentu hela ba manobra polítika sira-ne’e, tanba Prezidente Repúblika, iha 2017, la ezije ba VII Governu, ne’ebé nia fó pose, atu tuir rekizitu husi artigo 9.º Lei Partidu Polítiku no bele akontese fali agora.

“Hodi permite filafali atu FRETILIN tama iha Governu, presiza Konferénsia, nune’e mós PLP ho KHUNTO, ho razaun katak sira iha ona Governu laran. Maibé, Governu ne’ebé sei mosu, labele hanaran VIII Governu, tanba CNRT, ho 21 kadeira iha maioria parlamentár, sai tiha ona nune’e, Governu foun ne’e tenke mosu hosi koligasaun foun ida, atubele sai IX Governu”, hateten Vise-Prezidente CNRT, Virgílio Smith.

Kuadru CNRT ne’ebé envolve iha VIII Governu Konstitusionál mak hanesan Ministru Estadu Prezidénsia Konsellu Ministru, Hermenegildo Augusto Cabral Pereira, Ministru Negósiu Estranjeiru no Kooperasaun, Dionísio da Costa Babo Soares, Ministra Edukasaun, Juventude no Desportu, Dulce de Jesus Soares, Vise-Ministra Finansa, Sara Lobo Brites, Vise-Ministru Administrasaun Estatál, Abílio José Caetano, Sekretáriu Estadu Kooperativa, Arsénio Pereira da Silva, Sekretáriu Estadu Juventude no Desportu, Nélio Isaac Sarmento, Sekretáriu Estadu Arte no Kultura, Teófilo Caldas, Sekretáriu Estadu Asuntu Kombatente Libertasaun Nasionál, Gil da Costa Monteiro “Oan Soru”,

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here