Prezidente Conselho de Imprensa, Virgilio Guterres. Dokumentasaun Tatoli

DILI, 21 maiu 2020 (TATOLI)–Prezidente Konsellu Imprensa (CI, sigla portugés), Virgílio da Silva Guterres, apresia ho Prezidente Asosiasaun Jornalista Timor Leste (AJTL) ne’ebé ho inisiativa atu fó protesaun ba nia membru sira liuliu iha situasaun defisil hodi halo kooperasaun ho programa Nasoens Unidas ba Dezenvolvimentu (PNUD).

“Ha’u lori Konsellu Imprensa katak dala ida tan apresia esforsu ne’ebé AJTL halo atu fó protesaun ba nia membru sira liuliu iha situasaun defisil ida-ne’e. Bainhira ita uza termolojia front line ne’e ita uza iha situasaun konflitu. Maibé konflitu ho COVID-19 ne’e, lahanesan ho konflitu sira seluk. Ne’ebé, ema baibain dehan liña de fogo maibé ita lahatene liña fogo ne’e iha ne’ebé. Tanba ita-nia inimigu ne’e indizivél nune’e ita labele haree. Tanba ne’e mak ekipamentu ne’ebé parseiru (PNUD-KOICA) sira fó hanesan rompy anti peluru iha medan peran iha situasaun ida-ne’e,”, Prezidente Konsellu Imprensa, Virgílio da Silva Guterres, hateten ba jornalista sira iha nia deskursu, iha salaun KI, kintál Boot, Dili, kinta ne’e.

Tuir nia, AJTL halo CI ho PNUD hanesan parseiru integrante (partner integral) ne’ebé presiza malu tebes liuliu iha períodu defisil.

“Hahú kedas iha tinan 2016 bainhira Konsellu Imprensa eziste, situasaun polítika kona-ba rejime duodésimu la’o kedas ona entaun ho kooperasaun ne’ebé hahú, ita Konsellu Imprensa hala’o tiha kedas atividade mezmu ke la’o ho orsamentu ne’ebé defisil,” nia subliña.

Ho dezafiu hirak ne’e, nia dehan, mak apoiu ne’e mai tanba haree jornalista sira iha front line tanba bainhira simu tiha ekipamentu protesaun ne’e tenke iha front line nafatin labele sai fali back line.

“Bainhira simu tiha ekipamentu protesaun ba fali restorante hodi telefone fali fontes tanba la’ós mak foin akontese maibé uluk mós akontese hanesan ne’e ‘hotel journalism and mouse journalism’. Katak jornalista iha kuartu de’it mak hateke sai hodi telefone no notísia públika ona,” nia esplika ba jornalista sira.

Maibé ho ekipamentu hirak ne’e, nia dehan, atu ajuda maluk jornalista sira sai front line no field journalism la’ós hotel journalism and mouse journalism iha situasaun agora.

Tuir nia, maski ekipamentu iha ona maibé seguransa mós importante. Tanba ne’e, nia dehan, mate tanba halo atividade ka halo buat ruma maibé mate hakarak ba ne’e dehan ridículo ka konyol.

“Mezmu ita zero level maibé inimigu ne’e indizivel. Nune’e atu hakle’an tan maluk sira-nia koñesimentu báziku atu nune’e fó kobertura ne’ebé analítiku tanba baibain ema dehan infodemia. Tanba, pandemia mai tiha no infodemia, agora mosu tan plandemia,” Prezidente KI hateten.

Ho situasaun hirak ne’e, nia husu ba jornalista sira presiza akompaña situasaun global atu halo atualizasaun informasaun ba públiku ne’ebé kle’an.

Notísia Relevante: PNUD-KOICA Entrega Ekipamentu Protesaun COVID-19 ba AJTL

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here