Imajen Tatoli/Osória Marques.

DILI, 21 maiu 2020 (TATOLI)–Programa Nasaun Unida ba Dezenvolvimentu (PNUD) no KOICA, ohin, entrega ekipamentu protesaun COVID-19 no livru matadalan COVID-19 ba Asosiasaun Jornalista Timor Leste (AJTL) iha salaun Konsellu Imprensa (CI, sigla portugés), Kintál Boot, Dili.

Prezidente AJTL, Zeovania Vieira hateten, PNUD no KOICA nia tulun no apoiu ba AJTL nu’udar forma solidariade ba jornalizmu no liberdade imprensa no liberdade espresaun hodi hametin liután prosesu harii demokrásia no boa-governasaun iha país foun ne’e.

”Apoiu hirak ne’ebé parseiru UNDP no KOICA oferese ne’e sei haforsa liután papél kontrolu sosiál mídia nian liuhosi jornalista sira ne’ebé kompetente ho espriritu demkrótiku hodi kontribui nafatin ba prosesu harii demokrásia, kontabilidade no boa-governasaun iha kontestu dezenvolvimentu Nasionál nian,” dehan Prezidente AJTL ba jornalista sira iha nia deskursu, iha salaun CI, Dili, kinta ne’e.

Liuhusi serimónia entrega fasilidade prevensaun ba COVID-19 ne’e, Prezidente AJTL, Zevonia Vieira hateten, ajudu no apoiu ne’ebé KOICA no UNDP fó ne’e util tebes ba jornalista sira bainhira hala’o atividade jornalizmu nian iha terenu no fiar katak apiou ne’e sei hametin liután futuru koopersaun entre AJTL, UNDP no doadór KOICA ne’ebé reprezenta Governu Korea do sul.

Iha oportunidade ne’e, Prezidente AJTL ne’e mos agradese ba Konsellu Imprensa ba nia apoiu liuhosi fornesimentu espasu no fasilidade ba AJTL hodi realiza ninia atividade sira durante ne’e no hein katak apoiu ne’ebé CI oferese ne’e sei hametin liután jornalizmu ida ne’ebé livre no independente iha futuru.

Prezidente AJTL hateten, AJTL nu’udar organizasaun mahon ba jornalista Timor-Leste ne’ebé durante ne’e kontribui ona ba liberdade imprensa no hametin kompeténsia jornalista sira nian liuhusi formasaun lubuk ida no halo advokásia ba jornalista sira iha tempu ne’ebé sira hasoru problema.

Tanba ne’e, nia dehan, AJTL uza biban ida-ne’e hato’o agradesimentu ba Ajénsia Dezenvolvimentu Internasional Koreanu (KOICA) ne’ebé oferese ona ninia apoiu ba jornalista Timor-Leste liuhosi Ajénsia ONU, UNDP ho fornesimentu fasilidade prevensaun COVID 19 no apou ba realizasaun programa diskusaun ”Editors Club” foin dadauk ne’e.

Ekipamentu prevensaun no livru matadalan COVID-19 ne’ebé PNUD no KOICA fó apoiu ba AJTL mak Face Mask hamutuk 200, Hand Wash hamutuk 100, Hand Sanitilizer totál 200, no Journalism Booklets totál 200.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here