Traballadór sira hatun foos iha Portu Dili. Imajen Tatoli/António Gonçalves

DILI, 18 maiu 2020 (TATOLI) – Hafoin Governu liuhosi reuniaun Konsellu Ministru aprova pakote sosio-ekonómiku durante Estadu Emerjénsia ligadu ho prevensaun ba surtu COVID-19, maka pakote ne’e inklui mós medida ida ba distribuisaun sasán esensiál sira ne’ebé sei halo importasaun foos hamutuk tonelada 30.000 hodi reforsa stock nasionál. 

Foos ne’ebé daudaun sei iha prosesu akizisaun, sei reforsa stock nasionál durante fulan-tolu nia laran no sei mai husi Vietname.

Prezidente Sentru Lojistika Nasionál (CLN, sigla portugés), Agusto Junior Trindade, rekoñese daudaun ne’e  stock nasionál  ne’ebé parte CLN no setór privadu iha la sufisiente ona atu responde nesesidade populasaun Timor-Leste bainhira infrenta situasaun ruma iha fulan-tolu ka haat mai.

 Stock nasionál ne’ebé maka parte Sentru Lojístika Nasionál iha to’o ohin loron maka tonelada 196 de’it ona, ho nune’e ha’u bele dehan katak stock nasionál ne’ebé daudaun ne’e Governu no setór privadu iha la sufisienta atu korresponde ba populasaun sira iha situasaun krize no kestaun emejénsia seluk. Tanba  ne’e  maka ita halo akizisaun“, dehan Dirijente ne’e ba Agência Tatoli iha ninia knaar fatin, tersa ne’e.

Notísia Relevante: Prosesu Akizisaun Foos Tonelada 30.000 Husi Vietname iha Faze Finalizasaun

Tuir nia, konsume nasionál foos ba fulan-ida hamutuk tonelada 11.142, tanba ne’e bainhira foos husi Vietname mai tan sei bele sustenta populasaun durante fulan-tolu nia laran.

“Ita bele haree katak Timor-Leste iha maluk balun ne’ebé la’ós loron-loron han etu, maibé balun han kahur. Kuaze ita hotu kahur batar, ai-farina ba no seluk tan ba matabisu, entuan husi ne’e ita bele fiar katak ho foos tonelada 30.000 bainhira bele utiliza ho didi’ak maka bele asegura to’o fulan-haat“, nia karesenta.

Agusto Junior adianta liután katak, tuir monitorizasaun ne’ebé maka parte CLN halo ba setór privadu katak stock la to’o.

“Dadus ne’ebé  maka ami hetan ikus iha  loron 22 abríl, ami bele dehan foos husi CLN no foos ne’ebé setór privadu iha ba stock nasionál konta hamutuk tonelada 8.084 no aumeta tan  oituan foos husi  loja Kreatif Furak, ne’ebé maka sira hatama foin daudaun hamutuk tonelada 4.166 ne’e la to’o. Tanba ne’e ita halo tan akizasaun”, nia salienta.

Tuir Ministru Koordenadór Asuntu Ekonómiku interinu, Fidelis Manuel Leite Magalhães, foos ne’ebé Governu sei importa la’ós fahe de’it ba komunidade maibé atu reforsa stoke nasionál iha CLN.

Maibé atuál Ministru Reforma Lejizlativa Asuntu Parlamentár ne’e dehan, durante implementasaun Estadu Emerjénsia Governu iha medida relasiona ho foos ninian.

“Governu iha medida tolu, ida mak iha situasaun a’at loos ona Governu bele halo fó apoiu diretu ba sidadaun, maibé bainhira situasaun seidauk a’at loos maka Governu bele halo medida ruma inklui fa’an ba púbiku atubele hatún presu no komunidade bele sosa iha situasaun defísil nia laran. Entaun Governu bele halo intervensaun merkadu, intervensaun merkadu ne’e bele halo diretu tanba CLN hanesan empreza públika ka Governu liuhosi CLN bele fa’an filafali foos ba ita-nia setór privadu sira”, esplika Ministru Fidelis.

Antes ne’e, setór privadu sira mós halo ona akizisaun foos husi rai-li’ur hodi haforsa stock nasionál.

Hanesan iha loron 28 foin lalais, foos hamutuk tonelada 2.700 ho na’in husi Timor Food, Lda, atraka iha Portu Dili.

Primeiru Vise Prezidente Autoridade Portuáriu Timor-Leste (APORTIL), José Manuel Marques, informa tan durante períodu Estadu Emerjénsia, foos hamutuk tonelada 4.150 husi rai-li’ur maka to’o Timor-Leste no na’in maka setór privadu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here