Aviaun Filipina. Imajen/airbus.com

DILI, 21 maiu 2020 (TATOLI) – Tuir informasaun aviaun charter Filipina sei tula ema na’in-72 iha lorokraik ne’e husi Dili hodi fila ba sira-nia rai ida-idak, maibé hafoin pasajeru sira preparadu atu aranka aviaun ne’e kansela.

Prezidente Autoridade Aviasaun Sivíl Timor-Leste (AACTL, sigla portugés), Ana Rosalia  Ximenes Varela, konfirma Aviaun Filipina atu tula sidadaun estrajeiru hodi fila ba sira-nia nasaun orijen ida-idak maibé la konsege tanba seidauk hetan autorizasaun aérea husi Indonézia.

“Ohin ami simu informasaun ida katak iha aviaun ida husi Filipina atu tula sidadaun estrajeiru na’in-72, maibé aviaun ne’e ohin la konsege semo mai iha Timor-Leste tanba parte Indonézia ladauk fó autorizasaun ba sira slot time (autorizasaun aérea) tanba ne’e aviaun labele semo mai”, dehan Prezidente AACTL ba Agência Tatoli, via telefónika, kinta ne’e.

Notísia Relevante: Ohin, Aviaun Filipina Sei Tula Sidadaun Na’in-72 Fila ba Rai Ida-idak

Tuir Prezidente Autoridade ne’e, Aviaun Filipina ne’e la semo direta mai iha Timor-Leste maibé sei liu husi Indonézia, tanba ne’e presiza iha autorizasaun husi autoridade.

“Kuandu nia semo mai no halo tránzitu iha Indonézia, tenke hetan lisensa slot time maibé parese sira ohin mai para iha Indonezia atu liu mai ita nia parte maka Indonezía la fó slot time ba sira. Entaun aviaun ohin tenke filafali ba Filipina no la konsege to’o Dili”, Ana Rosalia akresenta.

Nia adianta, ba voo ne’e parte autoridade Timor-Leste laiha problema.

“Ha’u hanoin ba ita-nia ne’e laiha problema ba lisensa sira hanesan ne’e, hanesan Aviaun Filipina atu mai nia rezolve kedan ho parte ita nia”, nia salienta.

Maske nune’e, tuir informasaun ne’ebé maka parte AACTL simu katak aviaun ne’e semana oin maka sira sei semo hikas husi Filipina mai Timor-Leste.

“Informasaun ne’ebé maka ami simu fali katak aviaun Filipina ne’e sei halo fali voo husi Filipina mai ita-nia rai segunda semana oin. Parese sira mai iha Indonézia hodi resolve lisensa refere maka foin liu mai hodi tula pasajeiru estrajeiru ba ida-idak nia rai”, nia subliña.

Sidadaun na’in-72 ne’ebé maka atu repatria, kompostu husi Filipina na’in-57, Korea na’in-sanulu, Japaun na’in-haat no Amérika na’in-ida.

Jornalista : Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here