Aviaun Filipina. Imajen/airbus.com

DILI, 21 maiu 2020 (TATOLI) – Prezidente Konsellu Administrasaun Autoridade Navegasaun Aéreu Timor-Leste, Empreza Públika (ANATL, EP), Romualdo da Silva, informa katak ohin aviaun husi Filipina sei tula ema hamutuk na’in-72 hodi fila ba sira-nia rai.

“Sim, ami simu ona informasaun katak ohin aviaun ida husi Filipina sei mai tula sidadaun na’in-72 ba sira-nia rai ida-idak”, konfirma Dirijente ne’e ba Agência Tatoli via telefónika, kinta ne’e.

Nia dehan, sidadaun hirak ne’e fila tanba situasaun pandemia COVID-19 ne’ebé kontinua invade nasaun iha mundu.

Tuir Prezidente ANATL katak, sidadaun na’in-72 ne’ebé maka ohin fila kompostu husi Filipina na’in-57, Korea na’in-sanulu, Japaun na’in-haat no Amérika na’in-ida.

“Sira agora balun iha ona terminál aeroportu hodi hein aviaun. Aviaun husi Filipina to’o maizumenus tuku rua lorokraik. Bainhira aviaun mai sei tula sidadaun sira ne’e”, Romualdo subliña.

Governu liuhosi ANATL iha loron sábadu (04/04) deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Maski nune’e, haree ba nesesidade iha situasaun emerjénsia nia laran, Governu Timor-Leste liuhosi Ministériu Transporte no Komunikasaun (MTK) deside selebra akordu ho Airnorth, ne’ebé sei permite operasaun aéreu sira entre Dili no Darwin atu tula ekipamentu médiku relasiona ho COVID-19.

Tuir akordu ne’ebé estabelese ona iha loron tersa (07/04) entre Governu Timor-Leste no Airnorth, ligasaun aéreu atu garante konektividade iha situasaun emerjénsia nia laran no sei halo operasaun semana ida dala-tolu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here