Ohin Prezidente Parlamentu Nasionál Eleitu, Aniceto Guteres Hahu Reuniaun Lider Bankada Iha Parlamentu Nasionál. Imajen /Egas Cristóvão

DILI, 21 maiu 2020 (TATOLI)—Prezidente Parlamentu Nasionál Foun, Aniceto Guterres, hahú lidera reuniaun líder bankada hodi fixa ajenda plenária nian ba loron segunda no tersa, semana oin.

Aniceto Guterres konvoka konferénsia reprezentante bankada parlamentár, ne’ebé realiza, ohin, iha tuku 11.00.

Prezidente Parlamentu Nasionál Foun, Deputadu Aniceto Guterres, ohin hahú normaliza funsionamentu parlamentu nian tanba durante ne’e parlamentu husik paradu.

Xefe Bankada FRETILIN no PPN Eleitu, Aniceto Guterres. Imajen /Egas Cristóvão

“Agora buat hotu liu ona. Prezidente iha dever tomak haree funsionamentu parlamentu nian. Ohin mós ami atu halo konferénsia líder bankada,”  Aniceto Guterres, informa ba jornalista sira, iha Parlamentu Nasionál, kinta ne’e.

Asuntu ne’ebé reprezentante bankada parlamentár sira fixa mak hanesan normalizasaun ba funsionamentu Parlamentu Nasionál, ajendamentu sesaun plenária ba segunda no tersa, normalizasaun ba komisaun espesializada permanente sira no asuntu relevante seluk tán.

Iha reuniaun ne’e akompaña hosi Vise-Prezidente Parlamentu Nasionál, Deputada Maria Angelina Sarmento Lopez no Segundu Vise-Prezidente Parlamentu Nasionál, Deputadu Luís Roberto.

Hosi bankada FRETILIN nian partisipa Deputada Josefa Pereira. Hosi parte PLP nian partisipa hosi Xefe Bankada, Deputadu Cornélio Gama “L7”, Vise-Xefe Bankada, Francisco de Vasconcelos no Deputadu Noé Marcál. Hosi Partidu  KHUNTO nian, partisipa hosi Xefe Bankada, Deputadu António Nobre Tilman no Deputada Olinda Guterres. Entretantu, hosi parte Partidu Demokrátiku (PD) nian partisipa hosi Deputada Elvina Sousa.

Tuir observasaun hosi Agência TATOLI, hosi parte Bankada CNRT, UDT/FM no PUDD la partisipa iha reuniaun líder bankada ne’e, no bankada tolu (3) refere hala’o de’it serbisu iha ida-idak nia bankada.

Rejimentu Parlamentu Nasionál artigu 25 (Konferénsia Reprezentante Bancada Parlamentár sira-nian), alínea 1 hateten, konferénsia reprezentante bankada parlamentár sira-nian komposta hosi Prezidente Parlamentu, hosi prezidente bankada sira-nian, ka sira-nia reprezentante no hosi membru Governu nian ida.

Alínea 2 hosi artigu ne’e akresenta, prezidente reúni ho prezidente bankada parlamentár sira-nian, ka sira-nia reprezentante, hodi apresia asuntu hirak-ne’ebé hakerek iha artigu 51 no 52 no seluk tan ne’ebé hakerek iha rejimentu, bainhira sente katak presiza hodi asegura Parlamentu nia funsionamentu ne’ebé di’ak.

Purtantu alínea 3 hosi artigu 25 hosi RPN ne’e esplika, Governu iha direitu atu iha reprezentante iha konferénsia no bele intervein iha asuntu hirak-ne’ebé la relasiona de’it ho Parlamentu.

Hosi parte Governu nian partisipa hosi Sekretáriu Estadu Komunikasaun Sosiál (SEKOMS), Mericio Juvinal “Akara”.

Notísia Relevante: Arão Noé Muda Ona Ba Bankada CNRT, Aniceto Guterres Hahú Normaliza Funsionamentu PN

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here