Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos. Imajen/ Egas Cristovao

DILI, 22 abríl 2020 (TATOLI)—Vise-Prezidente Komisaun A (Asuntu Justisa no Konstitusionál), Deputadu Francisco de Vasconcelos  hateten, Kinta (V) Lejizlatura sei finaliza Lei Antí Korrupsaun (LAK) maibé kontinuasaun diskusaun seidauk la’o tanba kestaun Estadu Emerjénsia.

“Ita la hatene surtu COVID-19 ne’e bainhira mak hotu, ne’e situasaun ne’ebé nasaun hotu-hotu enfrenta. Tanba ne’e,  opiniaun públiku dehan Lei Antí Korrupsaun ne’e budu, la budu ida. Ne’e kompromisu ida ke Kinta Lejizlatura sei finaliza. Dokumentu hotu-hotu preparadu hotu ona hanesan deklarasaun de bens nian. Iha tinan kotuk dehan abríl (2020) maibé problema mak oras ne’e ita iha hela situasaun Estadu Emerjénsia,” Vise-Prezidente Komisaun A, Francisco de Vasconcelos, informa ba jornalista sira iha Parlamentu Nasionál, kuarta ne’e.

Nia hatutan, bainhira fulan-ida ne’e ramata, karik Timor-Leste laiha ona problema ho moras ne’e entaun bele ajenda ona hodi halo diskusaun maibé sé situasaun Coronavirus (COVID-19)  kontinua entaun seidauk bele diskute LAK ne’e.

Nia dehan, Governu fó-sai ona katak estende tán Estadu Emerjénsia ba loron 30 tán signifika fulan-maiu mós seidauk bele deskute.

“Juñu hanesan ne’e mak ita haree fali maibé ita haree Estadu Emerjénsia ba situasaun COVID-19 ne’e hotu, klaru katak Komisaun A sei aselera lei rua, Lei Antí Korrupsaun no Lei Podér Lokál ne’e. Ha’u hanoin públiku pasiénsia uitoan tanba situasaun ita-nian mak hanesan ne’e, la’ós sees-aan,” nia hateten.

Deputadu PLP ne’e haktuir, Timor-Leste foti referénsia barak hosi Macau nian hodi halo ajustamentu ba Lei Antí Korrupsaun (LAK) ne’e tanba Macau nia lei di’ak tebes.

Notísia Relevante: Carmelita Moniz Promete Finaliza Lei Antí Korrupsaun Molok Termina Kinta Lejizlatura

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here