Xefe Estadu La Tolera Aktu Violénsia Deputadu Balun iha PN

DILI, 20 maiu 2020 (TATOLI)–Xefe Estadu Francisco Guterres “Lú Olo”, la tolera aktu violénsia hosi deputadu balun iha Parlamentu Nasionál ne’ebé akontese foin lalais ne’e, hafoin mosu dezintendimentu entre deputadu sira hosi Partidu PLP, KHUNTO no FRETILIN, ho CNRT.

Intolenránsia ba aktu violénsia ne’e, xefe estadu hato’o, liuhosi mensajen kommerasaun Loron Restaurasaun Independénsia Timor-Leste ba dala-18, iha Palásiu Prezidensiál Nicolau Lobato, Bairru Pité, Dili.

“Partidu polítiku sira ne’ebé ho asentu parlamentár tenke favorese no fasilita deputadu sina-nia kna’ar. Ita labele tolera uzu violénsia, verbál ka fíziku, hosi deputadu balun iha Parlamentu Nasionál,” PR Lú Olo kondena.

Xefe Estadu hateten, Krize institusionál ne’e hetan solusaun bainhira partidu sira kontribui ho laran luak no moos ba funsionamentu Parlamentu Nasionál nian, tuir prinsípiu no regra demokrátika sira ne’ebé desizaun bazeia ba maioria no mós sira-nia reprezentatividade no proporsionalidade.

“Ha’u reafirma ha’u-nia kompromisiu tomak atu kontinua koopera ho Órgaun Estadu hotu-hotu. Nu´udár Prezidente Repúblika, ha´u hakarak fó-sai dala ida tan katak ha’u sei hala’o nafatin diálogu ho partidu polítiku sira ho asentu parlamentár hodi garante demokrasia, governabilidade, páz no estabilidade iha ita-nia rain, iha momentu ne’ebé de’it. Atu garante valór no prinsípiu sira ne’e, órgaun soberanu sira no ita hotu tenke respeita Konstituisaun no lei sira ne’ebé vigora,” PR Lú Olo kompromete.

Antes ne’e, deputadu balun hosi Partidu CNRT defende meza Prezidente Parlamentu Nasionál to’o baku fila meza bo kadeira, bainhira Vise Prezidente Parlamentu Angelina Sarmento ho Luis Roberto hakarak hola fatin atu lidera plenária hodi destitui Prezidente PN, tanba Prezidente Parlamentu Nasionál, Arão Noé de Jesusda Costa Amaral, auzente iha plenária durante loron rua.

Notísia Relevante: PR Lú Olo: “Ha’u-Nia Matadalan Úniku Mak K-RDTL”

Jornalista : Cipriano Colo

Editór     : Cancio Ximenes