Prezidente Repúblika,Francisco Guterres Lú Olo. Imajen Tatoli/António Gonçalves

DILI, 20 maiu 2020 (TATOLI)–Prezidente Repúblika (PR), Francisco Guterres “Lú Olo”, afirma nafatin ninia pozisaun nu’udár xefe estadu katak to’o ohin loron, ninia matadalan úniku maka Konstituisaun Repúblika Demokrátika Timor Leste (K-RDTL).

“Iha okaziaun selebra loron boot ida ne’e, ha’ u hakarak afirma fila-fali, ohin, ha’u-nia juramentu halo tinan tolu liubá bainhira simu pose iha Tasi-Tolu. Katak, ha’u sei sai Prezidente hotu-hotu nian no ba ema hotu. To’ o ohin loron, ha’u-nia matadalan úniku mak Konstituisaun RDTL, lei inan ne’ebé define momoos ha’u-nia knaar nu’udar Prezidente Repúblika,” afirma Prezidente Repúblika, Francisco Guterres “Lú Olo”, liuhosi mensajen komemorasaun Loron Restaurasaun Independénsia Timor-Leste ba dala 18, iha Palásiu Prezidensiál Nicolau Lobato, Bairrupité, Dili, kuarta ne’e.

Xefe Estadu ne’e haktuir, durante mandatu mosu krize institusionál grave ida ne’ebé obriga nia foti desizaun disolve Parlamentu Nasional no konvoka Eleisaun Antesipada.

“La’ós fásil mai ha’u foti desizaun hakotu órgaun soberania ida-nia knaar tanba ha’u respeita tebes Povu nia votu. Povu vota hodi hili ukun-nain sira ba tinan lima. Ita labele halimar ho aktu demokrátiku ida-ne’e tanba ita bele halakon Povu ninia fiar iha ita-nia sistema hili ukun-nain sira. Bainhira Povu lakon fiar, ita-nia ukun-an no ita-nia Estadu- Direitu-Demokrátiku bele lakon folin,” nia dehan.

Bainhira Orsamentu jeral Estadu 2020 la pasa, PR Lú Olo hatutan, mosu duni krize instutitusional ida maibé la’ós grave tanba Parlamentu Nasional no Governu hala’o nafatin sira-nia knaar konstitusional, no sei iha kondisaun atu Instituisaun Estadu sira atu funsiona tuir regra prinsípiu demokrátiku.

Karik maioria parlamentar, iha tempu ne’ebá hakarak hamonu Governu, nia dehan, Konstituisaun fó kbiit ba deputadu sira aprova mosaun sensura no aprezenta ba Prezidente Repúblika atu tetu demite ka lae Governu maibé sira la uza kbiit konstitusional ida-ne’e.

Tanba ne’e, nia dehan, biar Orsamentu Jeral Estadu 2020 iha 17 janeiru liubá la pasa iha Parlamentu Nasional, Konstituisaun RDTL sei fó dalan ba Parlamentu Nasional bele aprova Orsamentu seluk ida ba tinan 2020.

“Iha kontestu ida-ne’e mak ha’u hahú ho ronda diálogu dahuluk ho partidu polítiku sira ne’ebé iha asentu parlamentar atu sira kontribui ba Prezidente Repúblika atu tetu no deside se kontinua fó kbiit nafatin ba atuál Governu ka forma Governu foun,” nia haktuir.

Nia dehan, kna’ar Prezidente Repúblika maka fó-hanoin ba partidu polítiku sira saída mak Konstituisaun RDTL haruka iha kontestu relasaun Parlamentu Nasional ho Governu no Prezidente Repúblika.

“Ho laran haksolok mak ha’u haree katak partidu polítiku sira ho asentu parlamentár buka malu duni. Parlamentu Nasionál maka bele fó lejitimidade ba Governu. Baze ba sustenta Governu mai hosi partidu sira ne’ebé konstitui maioria parlamentár. Maioria ida ne’e bele harii molok eleisaun ka hafoin eleisaun hotu. Maibé, maioria parlamentár mós bele mosu iha momentu ne’ebé de’it, molok lejislatura hahú ka durante períodu lejislatura,” xefe estadu afirma.

Tanba la’ós krize institusional grave, Prezidente Repúblika fó tempu ba líder polítiku sira hatasak ida-idak ninia hakarak no buka hametin relasaun partidu ba partidu, atu sira mak kontribui hodi hetan solusaun ne’ebé bele lejitima no sustenta Governu atual ka Governu foun, liuhosi Parlamentu Nasionál.

“Lei partidu polítiku fó dalan atu partidu polítiku sira organiza malu oinsá de’it, liuhosi koligasaun, aliansa ka movimentu polítiku. Bele mós fó liman ba malu liu de’it hosi entendimentu polítiku ida ne’ebé bazeia ba insidénsia parlamentár. Partidu polítiku sira uza lei ida-ne’e hodi hili dalan ida,” nia hatutan.

Iha prosesu relasaun partidu ba partidu mak mosu maioria parlamentar, maibé nia dehan, Maioria parlamentár ida ne’ebé metin ba tempu naruk mak fó kbiit no estabilidade ba Governu durante ninia mandatu.

“Ita hotu bele haree katak partidu sira ho asentu parlamentár mak buka malu rasik hodi hetan solusaun ba krize institusionál ne’ e. Prezidente Repúblika la tama iha relasaun partidu sira-nian,” nia dehan.

Iha prosesu ida-ne’e mak mosu faktu sira ne’ebé iha relevánsia konstitusionál ba Prezidente Repúblika foti dezisaun polítika ida ke boot, finál no vinkulativu, atu demite ka la demite Governu, atu disolve ka la dissolve Parlamentu Nasionál.

Hosi prosesu ne’e mosu maioria parlamentar foun ida ho partidu polítiku tolu ho asentu parlamentar PLP, KHUNTO, no FRETILIN. Maioria ne’e, ho deputadu 36, deklara ona sira-nia apoiu tomak no metin ba VIII Governu Konstitusional no Primeiru-Ministru General Taur Matan Ruak. Faktu ida ne’e apoia kontinuidade no fó estabilidade ba VIII Governu Konstitusionál.

Faktu ida hanesan ne’e mak relevánsia konstitusional ba dezisaun polítika hosi Prezidente Repúblika atu fó konfiansa ba VIII Governu hodi ukun to’o mandatu ramata, iha tinan 2023.

“Deputadu sira iha Parlamentu Nasionál reprezenta povu tomak. Sira-nia devér maka buka kontribui didi’ak ba funsaun lejislativa, fiskalizasaun no desizaun polítika ne’ebé Konstituisaun Repúblika haruka,” nia deklara.

Nu’udár xefe estadu, fó hanoin katak, Deputadu sira labele hamosu depropózitu, situasaun ida ne’ebé bele sai fali obstákulu ba normáll funsionamentu Parlamentu Nasionál nian, labele hamosu situasaun ho objetivu atu provoka krize institusionál atu dudu hodi kbi’it Prezidente Repúblika atu disolve Parlamentu Nasionál no konvoka Eleisaun Antesipada.

Notísia Relevante: EE Besik Ramata, PR Alerta ‘Matan Moris’ Nafatin

Jornalista : Cipriano Colo

Editór      : Cancio Ximenes

1 KOMENTÁRIU

  1. Sr presidente kolia mas kontinua la konvense ami povu tamba sr la imparsial i lakohi koalia konaba koligasaun foun ida forma tia ne la hili derepente fretelin tama aceita tia kedas tamba saida? Desculpa deit sr presidente ne lalos

HAKEREK NO HATÁN

Please enter your comment!
Please enter your name here