Prezidenti da Republika, Francisco Guterres Lu Olo.Imajen/Antonio Goncalves

DILI, 20 maiu 2020 (TATOLI)–Maski iha semana oin mai Estadu Emerjénsia (EE) remata maibé Prezidente Repúblika (PR), Francsico Guterres “Lú Olo”, liuhosi mensajen komemorasaun restaurasaun independénsia ba dala-18, alerta ba povu Timor-Leste (TL) atu kontinua matan moris nafatin.

“Semana oin, Estadu Emerjénsia ba daruak sei ramata. Maibé, Prezidente-Repúblika hakarak fó hanoin fila-fali, alerta ne’ebé Organizasaun Mundiál Saúde fó-sai katak vírus korona ne’e sei la lakon iha tempu badak. Ita tenke matan-moris nafatin, liuliu tanba seidauk iha vasina atu ida-idak bele hasees-an hosi moras COVID-19,” dehan Xefe ba jornalista sira  Palásiu Prezidensiál Nicolau Lobato, Bairru Pité, Dili, kuarta ne’e.

Xefe estadu fó hanoin katak, iha 21 fulan marsu 2020, ministériu saúde fó-sai notísia katak COVID-19 tama tiha ona Timor-Leste, no tanba Timor-Leste la preparadu mak sai preokupasaun ho notísia aat ida-ne’e.

“Nune’ e, ita hotu nia atensaun fila ba oinsá proteje-an no proteje ita-nia Povu hosi moras ne’e, enkuantu ita hotu buka mós haree oinsá tau matan lalais ba populasaun afetadu hosi udan-boot no bee-sa’e iha Dili no munisípiu sira seluk. Iha kontestu ne’e mak ha’u deside fó fiar nafatin ba VIII Governu no Primeiru-Ministru atu hala’o nafatin sira-nia knar,” nia haktuir.

Haree ba ameasa boot hosi COVID-19, VIII Governu ho preokupasaun propoin ba Prezidente Repúblika hodi dekreta Estadu Emerjénsia.

Tanba ne’e, haree ba dadus husi Organizasaun Mundial Saúde (OMS) no fonte seluk, kona-ba pandemia COVID-19 katak moras ne’e la’o ona iha rai barak, inklui iha Timor-Leste, no hamate ona ema rihun ba rihun mak iha loron 27 fulan marsu 2020, Xefe Estadu dekreta Estadu Emerjénsia ba fulan ida, liuhosi autorizasaun Parlamentu Nasional nian.

“Liu tiha fulan ida, ha’u renova fali Estadu Emerjénsia, ho Estadu tomak nia naran. Ho Estadu Emerjénsia, ita fó biban ba ita-nia sistema saúde nasionál hodi hasoru pandemia ida ne’e. Governu foti medida oin-oin, inklui taka fronteira no harii fatin ba kuarentena no ba izolamentu enkuantu ekipa oin-oin hanorin ita-nia ema oinsá hasees-an hosi moras COVID-19. To’ o ohin loron ita seidauk rejista, iha ita-nia rain, kazu ruma ne’ebé mate tanba COVID-19,” Aman nasaun ne’e rekoñese.

PR Lu Olo mós esplika, VIII Governu Konstitusionál ne’ebé lidera hosi Primeiru-Ministru, Taur Matan Ruak, halo esforsu konsertadu no servisu hamutuk ho instituisaun hotu-hotu, tékniku timoroan sira no internasionál, konfisaun relijiozu hotu, sosiedade sivíl tomak no Povu en-jerál hodi prevene moras COVID-19 la hada’et ba populasaun.

Xefe Estadu konsidera susesu iha faze ida ne’e fó orgullu ba timoroan hotu ne’ebé hadomi rai no Povu.

Notísia Relevante: Prezidente Repúblika Preokupa ba I-VIII Governu Monu Tutuir Dalan

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here