Prezidente Republika,Imajen/Media PR

DILI, 20 maiu 2020 (TATOLI)–Prezidente Repúblika (PR) Francisco Guterres “Lú Olo”, ohin, iha komemorasaun Loron Restaurasaun Independénsia Timor-Leste ba dala-18, ezerse nia kompeténsia hodi fó indultu ba prizioneiru sira bazeia ba artigu 85° Konstituisaun no Kódigu Penál, no haree mós ba Lei Nú. 5/2016, publika iha 25 maiu.

Tinan ida-ne’e, Prezidente Repúblika Francisco Guterres “Lú Olo” simu hosi Ministériu Justisa (MJ) pedidu indultu no komutasaun ba pena no pedidu sira-ne’e halo ba prizioneiru sira hamutuk ema na’in-184.

Tuir lei, pedidu ida-idak tenke tuir prosedimentu atu komprova situasaun ida ne’ebé bele fó dalan atu hetan desizaun hosi Prezidente Repúblika.

Ida ne’e signifika katak, prosesu ida-idak tenke akompaña ho dokumentu balun hanesan relatóriu husi servisu siras reinsersaun sosiál no informasaun seluk, inklui kona-ba kondisaun saúde prizioneiru nian ne’ebé hasa’e hosi junta médika ida.

“Tanba ita iha hela estadu emerjénsia nia laran, servisu relevante sira la konsege kompleta informasaun ba pedidu hotu-hotu atu Prezidente Repúblika foti desizaun. Nune’e, Prezidente Repúblika bele foti de’it desizaun ba pedidu balun. Iha tempu badak mak sei-fó hatene sira-naran,” Xefe Estadu koa’lia liu husi mensajen komemorasaun Loron Restaurasaun Independénsia ba dala-18, iha Palásiu Prezidensiál Nicolau Lobato, Bairru Pite, Dili, kuarta ne’e.

Kona-ba pedidu sira seluk sei prosesa no Prezidente Repúblika sei foti desizaun iha loron istóriku rua seluk hanesan loron referendu 30 Agostu no proklamasaun RDTL 28 Novembru tinan ida-ne’e nian.

Notísia Relevante: PR Lú Olo: “Ha’u-Nia Matadalan Úniku Mak K-RDTL”

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here