Prezidente Repúblika, Francisco Guterres ‘Lu Olo’. Imajen Tatoli/António Gonçalves

DILI, 20 maiu 2020 (TATOLI)–Prezidente Repúblik (PR), Francisco Guterres “Lú Olo”, ohin, espresa ninia preokupasaun kona-ba Timor-Leste nia ukun-aan ne’ebé mosu dezafiu oin-oin hanesan Primeiru to’o Oitavu Governu Konstitusionál ne’ebé monu tutuir dalan no iha IV Governu de’it mak metin to’o nia rohan.

“Iha ita-nia ukun to’o agora mosu dezafiu oin-oin. Banhira haree ba kotuk, mandatu governu ne’ebé to’o rohan mak IV Governu de’it. Governu sira seluk monu tuituir dalan. Tanbasá. Ida ne’e sai preokupasaun boot tebes mai ha’ u, nu’udár Prezidente Repúblika,” dehan PR Lú Olo iha ninia mensajen ba komemorasaun restaurasaun Independénsia ba dala-18 ba povu no nasaun Timor-Leste, iha Palásiu Prezidensiál Nicolau Lobato, Bairru Pité, Dili, kuarta ne’e.

Nia hatutan, loron ohin la’ós atu fó-hanoin de’ it konkista boot ne’e, presiza hanoin kle’an saída mak halo ona no saída mak presiza halo, maibé la halo hosi 20 maiu 2002 to’ o 20 maiu 2020.

“Presiza tetu kle’an kona-ba osan ne’ebé ita hasai tinan-tinan hosi Fundu Minarai no gasta oinsá. Iha hahalok ruma ne’ebé gasta osan barak maibé lalori benefísiu ba Povu. Ha’u husik hela hanoin kle’an ne’e ba ita hotu, iha loron ohin, liuliu ba ukun-nain sira, iha tinan sanulu resin ualu nia laran,” Xefe estadu husik hela mensajen.

Aman ba nasaun ne’e haktuir, tinan ida ne’e Timor-Leste hahú kedas ho problema ne’ebé afeta mandatu VIII Governu, ne’ebé harii ho maioria parlamentar ida mai hosi aliansa partidu tolu CNRT, PLP no KHUNTO, ne’ebé manán eleisaun antesipada iha 12 maiu 2018.

Biar maioria parlamentar, nia dehan, bele garante estabilidade governativa, mosu hosi maioria ne’eduni hahalok ida ne’ebé hatudu relasaun frájil ida katak relasaun ne’e la metin entre sira.

Tanba Orsamentu Jerál Estadu 2020 la pasa iha Parlamentu Nasional, PR Lu Olo konsidera situasaun foun ida ne’e komplika Estadu tomak ninia funsionamentu no afeta mós Povu nia moris.

“Ita selebra ohin, 20 de Maio 2020, Loron Restaurasaun Independénsia Timor-Leste ba dala sanulu-resin-ualu. Tanba ita sei tuir hela Estadu Emerjénsia, Governu propoin ba Prezidente Repúblika atu fó-hanoin data istórika ne’e, liu de’ it hosi mensájen ida ba Povu. Ha’u simu proposta ne’e, ho haksolok, nu’ udar medida Estadu Emerjénsia atu proteje nafatin Povu Timor-Leste hosi moras COVID-19,” Xefe estadu ne’e espresa sentimentu ksolok.

Nia konta tuir katak, hanesan tinan-tinan, Prezidente Repúblika hato’o mensájen ba Povu hodi fó-hanoin hikas konkista boot ida ne’ e. Katak hafoin luta ho terus oin-oin durante tinan rua nulu resin haat, komunidade internasionál rekoñese duni Timor-Leste nu’udár Estadu Soberanu, ne’ebé harii iha 28 novembru 1975.

“Iha loron 20 maiu 2002, afirmasaun ba ita-nia identidade nakfilak ba ezersísiu soberania ho rekoñesimentu internasionál. Tanba hetan rekoñesimentu ne’e, Timor-Leste rejista iha Nasaun Unida, nu’ udár Estadu ida ho direitu no dever hanesan Estadu sira seluk. Liuhosi mekanizmu Nasaun Unida nian, ita bele mós hato’o ita-nia solidariedade ba Povu no País sira seluk, iha momentu ne’ebé de’it,” nia haktuir.

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here