DILI, 20 maiu 2020 (TATOLI) –Dadus ofisiál husi Sala Situasaun Sentru Integradu Jestaun Krize (SS-CIGC, sigla portugés) ba kuarta ohin (20/05/2020), fó sai katak, total abitante ne’ebé kumpre hela konfinamentu obrigatóriu ka kuarentena hela na’in-44, inklui pesoál saúde na’in-11.
Notísia Relevante : Kazu Foun COVID-19 Laiha, Númeru Abitante iha Kuarentena Komesa Menus
“Pesoál saúde hirak-ne’e, tuir loloos bele fila ona ba uma, maibé sei hein tan rezultadu teste ba na’in ida ne’ebé iha prosesu hela,” informa portavós SS-CIGC, Odete da Silva Viegas, liuhusi konferénsia imprensa iha Sentru Mídia CIGC iha Sentru Konvensaun Dili (CCD).
Husi na’in-44 ne’e kompostu husi na’in-38 iha fasilidade governu nian iha Dili no na’in-neen (6) mak iha fasilidade governu nian iha munisípiu seluk.
Iha mós númeru abitante ne’ebé kumpre auto-kuarentena hamutuk na’in-43, kompostu husi na’in-38 iha Dili no na’in-lima (5) iha munisípiu seluk.
Dadus update husi SS-CIGC ne’e mós fó sai katak, totál abitante ne’ebé pasa ona loron-14 iha konfinamentu obrigatóriu na’in-2.250, kompostu husi na’in-1.750 husi Dili no na’in-500 iha munisípiu seluk.
Odete da Silva Viegas, haktuir, situasaun nasionál kazu COVID-19 nian hatudu númeru kumulativu teste 1.533, totál númeru hein rezultadu 253, totál kumulativu kazu konfirmadu mantein 24, kazu konfirmadu foun la iha (0), kazu mate la iha (0), kumulativu rezultadu negativu 1.256, númeru baixa Sentru Izolamentu Vera Crus la iha (0) no totál kazu rekupera ona 28, kompostu husi konfirmadu 24 no provavel haat (4).
“TL agora zero kazu ba COVID-19. Rezultadu ida-ne’e esforsu ita hotu nian, ita konsege kontein , detein, izola no trata situasaun COVID-19. Susesu ne’ebé ita hetan fó liu tan motivasaun no dezafia ita hotu serbisu no unidade mak ita ultrapasa. SS-CIGC hato’o obrigadu ua’in ba ita hotu nia kolaborasaun,” afirma Odete da Silva Viegas.
Jornalista : Eugénio Pereira
Editór : Francisco Simões
