Ministru Defeza, Filomeno da Paixão de Jesus. Imajen/António Gonçalves

DILI, 19 maiu 2020 (TATOLI)--Ministru Defeza Seguransa no Ministru Interiór Interinu, Fiomeno da Paixão de Jesus, husu ba povu Timor-Leste atu kontinua mantein hakmatek no labele intervein ba problema politika rai laran.

Paixão fó sai apelu ne’e, hafoin enkontru ho Prezidente Repúblika (PR), Francisco Guterres “Lú Olo”, iha palásiu Prezidensiál Bairru Pité, Dili.

“Mensajen mak ne’e, populasaun ida-idak tuur nonok iha fatin. Ita-nia lider partidaria sira sei iha. Ita-nia Prezidente Repúblika iha. Ita-nia Prezidente Parlementu Nasionál iha. Ita-nia Primeiru-Ministru iha. Membru governu sira ne’ebé mak kaer área sira ne’e, sei iha hotu. Ne’e hatudu katak, ita iha posibilidade atu deside situasaun ne’e,” dehan Fiomeno da Paixão de Jesus ba jornalista, tersa ne’e

Nia mós fiar katak, líder politiku sira sei iha sentidu responsabilidade no iha kapasidade atu foti desizaun hodi hakotu situasaun atuál.

“Ha’u-nia apelu mak ida-ne’e ba populasaun, lalika ba kahur aan iha problema ne’ebé mak pretense ba parte politika nian. Tanba ita la’ós foin mak liu-hosi krize ida, ita iha posibilidade, ita iha kompeténsia, ita iha kapasidade atu rezolve krize,” nia alerta.

Nia dehan, durante enkontru ho Prezidente Repúblika, Xefe Estadu hateten sempre akompaña situasaun no Prezidente Repúblika Rasik fiar katak, iha Parlamentu Nasionál sei rezolve problema tanba iha deputadu sira, iha Prezidente PN no iha vise PN sira.

“Ha’u mós fiar katak sira bele rezolve situasaun ne’e no ha’u rasik sei ajuda atu rezolve sitausaun ne’e,” Paixão promete.

Antes ne’e Primeiru MInistru (PM), Taur Matan Ruak, mós fó hanoin katak bainhira ema boot sira hemu tua, povu labele lanu. Nune’e, nia husu ba populasaun tomka atu tuur hakmatek, kontinua hala’o servisu hanesan baibain, hodi fó tempu ba líder polítiku sira atu buka solusaun ba impase politika rai laran.

Notísia Relevante: Taur: “Husik Ami Boot Sira Mak Buka Solusaun ba Problema”

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here